Yuri Kim po mban konferencën e fundit para se të lërë detyrën si ambasadore e SHBA-së në Shqipëri. Diplomatja amerikane tha se është mirënjohëse që pati mundësinë të njihej me vendin ndërsa u ndal edhe tek reforma në drejtësi, për të cilën tha se nuk është e përsosur por po jep rezultate.
“Ndërsa plotësoja misionin tim, jam kaq mirënjohëse që pata mundësinë ta njoh këtë vend, të vizitoj të 61 bashkitë dhe si çdo ambasador të përpiqem të jap pjesën time në synimet tona të përbashkëta, në demokraci, mbrojtje dhe biznes. Shqipëria ka ndërmarrë reforma të vështira, veçanërisht në drejtësi që i dha mundësinë vendit të hapte negociatat me BE-në.
E kam thënë shpesh se reforma në drejtësi nuk është e lehtë, e shpejtë apo e përsosur, por po jep rezultate dhe këmbëngulja juaj ka filluar të japë fryte. Mos ndaloni. Vazhdoni përpara hap pas hapi derisa të arrini qëllimin tuaj. SHBA do të jenë me ju në çdo hap të rrugës”, tha mes të tjerash ambasadorja Kim.
Yuri Kim vlerësoi dhe arritjet e Shqipërisë në arenën ndërkombëtare, duke thënë se SHBA është ndjerë krenare për pozicionimin e vendit tonë krah Ukrainës, drejtimin e Këshillit të Sigurisë si dhe strehimin e afganëve.
Kim nënvizoi se marrëdhëniet mes Shqipërisë dhe SHBA nuk kanë qenë kurrë më të forta.
p.k\dita
