Pas transmetimit të investigimit të emisionit ‘Report’ në RAI3 dhe akuzave të opozitës, kryeministri Edi Rama ka reaguar sërish përmes një videomesazhi në llogarinë e tij në Facebook. Rama iu përgjigj akuzave të “Report”, ku të dielën dha edhe një intervistë duke iu përgjigjur akuzave në mënyrë direkte, duke theksuar se investigimi ishte pa fakte dhe thjeshtë përmendeshin emra, ndërsa e quajti të fabrikuar nga elementë pranë opozitës.
Rama i ka bërë thirrje shqiptarëve, të braktisin ata të cilët i kanë persekutuar gjithë këto vite, ndërsa shtoi se pakica nuk ka nevojë të ndjekë shumicën, mjafton të mos mbështesë ata të cilët janë sjellë keq me ta që në fillimet e demokracisë.
“U mbars mali për të pjellë një mi. Ishte një investigim italo-shqiptar pa fakte. Ua thash në mes të Italisë së ç’ishtë ai pseudo investigim i tyre. Nuk iu shmanga ballafaqimit dhe e publikova të pacensuruar.
Unë e kam me shqiptarët e zakonshëm: Mos i falni më. Braktisini përgjithnjë në vetminë e ujërave të zeza të politikës së tyre!
Pakica të mos i bashkohet shumicës nëse nuk do, por mos të bashkohet me ata sepse nuk i duhen më as dreqit.
Ata janë mishërimi i shpirtit të së keqes që po del nga jeta e Shqipërisë duke u çjerrë nga përpëlitjet e fundit. Ky vend ka kryer punë me ata, ka kryer me atë shpirt të keq që e persekuton që prej vitit 1912”, tha ai.
Kreu i qeverisë tha se vendin nuk e ndal më asgjë, pavarësisht nga përpjekjet sipas tij që bëhen për të hedhur baltë mbi Shqipërinë dhe shqiptarët.
“Shqipërinë nuk e ndal më asgjë dhe nuk ia përcakton më të ardhmen askush përveç nesh, shqiptarëve këtu. Kokën lart dhe vetëm përpara”, deklaroi Rama.
b.m/dita
