Një muaj më parë, në të gjitha qendrat shëndetësore të vendit nisi dhënia me rimbursim e fishave të diabetit edhe për pensionistët e moshës mbi 65 vjeç. Të dhënat e raportuara nga strukturat shëndetësore të nivelit parësor, konfirmojnë se deri më tani, janë mbi 20 mijë të moshuar që kanë përfituar falas fishat për matjen e glicemisë.
Gjatë ndjekjes nga afër të këtij procesi në Qendrën Shëndetësore në Ndroq , ministrja e Shëndetësisë dhe Mbrojtjes Sociale, Ogerta Manastirli, bëri me dije se mjeku i familjes duhet të lajmërojë çdo pensionist të kësaj grupmoshe për marrjen e recetës së rimbursimit edhe për fishat, krahas asaj të barnave që përfshin skema aktuale.
“Mjekët e familjes janë duke bërë një punë shumë të mirë për të lajmëruar të gjithë ata që kanë recetat për trajtim, qoftë ata oral, dhe ata që trajtohen me insulinë, që në momentin që të vijnë dhe të marrin barnat me rimbursim, të kenë mundësi të marrin edhe fishat e diabetit dhe të kenë mundësi të plotësojnë ciklin aq shumë të nevojshëm të trajtimit, por nga ana tjetër edhe të kontrollit periodik që duhet për të bërë çdo njeri që vuan nga diabeti dhe për t’i patur fishat falas. Deri më tani janë më shumë se 20 mijë të moshuar mbi 65 vjeç, të cilët kanë përfituar fishat e diabetit falas nga ky program”, deklaroi ministrja Manastirliu.
Gjatë bashkëbisedimit me të moshuarit, ministrja Manastirliu u shpreh se me këtë vendim të qeverisë që tashmë po gjen zbatim në të gjithë vendin, u kursehet të moshuarve rreth një pension mujor në vit.
Rimbursimi i fishave të diabetit nisi fillimisht për grupmoshën 0-18 vjeç në vitin 2018. Më pas pjesë e skemës së përfitimit të fishave me rimbursim u bënë edhe të rinjtë e grupmoshës deri 25 vjeç.
Ndërkohë që nga data 27 shkurt e këtij viti, fishat për matjen e glicemisë po jepen falas në të gjitha farmacitë e rrjetit të hapur që kanë kontratë me FSDKSH, edhe për të moshuarit mbi 65 vjeç. Janë 50 mijë qytetarë që përfitojnë fishat e diabetit me rimbursim.
p.k\dita
