Një 31-vjeçar është vënë në hetim ditën e djeshme, pasi tentoi të fuste një sasi eurosh të padeklaruara në vendin tonë, nëpërmjet pikës kufitare të aeroportit të Rinasit. Burime zyrtare konfirmuan se në çantën e të dyshuarit me inicialet E. H., u gjetën 17550 euro, të cilat i riu tentoi t’i fuste në vendin tonë pa i deklaruar konform ligjit. Në përfundim të veprimeve procedurale për këtë rast, u referuan materialet në Prokurori, ku nisi procedimi në gjendje të lirë 31-vjeçarin, banues në Librazhd, për veprën penale “mosdeklarimi në kufi i të hollave dhe sendeve me vlerë”.
Shuma e parave u sekuestrua në cilësinë e provës materiale. I dyshuari tha se nuk kishte dijeni për limitin e shumës që duhej deklaruar.
