Një rikthim i virusit të fruthit e ka detyruar OBSH-në t’u kërkojë vendeve të nisin menjëherë fushata të reja imunizimi. Përgjatë 10 muajve të parë të vitit 2023, në Europë, numri i të prekurve nga fruthi është rritur tridhjetëfish në raport me të njëjtën periudhë të vitit 2022 (30 mijë raste në janar-tetor 2023, 914 raste në janar-tetor 2022).
Për këtë epidemi të re, OBSH bën fajtore rënien e niveleve të vaksinimit.
Virusi është jashtëzakonisht infektiv dhe shkakton ethe, kollë dhe në raste të rralla pneumoni, inflamacion të trurit dhe vdekje.
“Duhen përpjekje urgjente vaksinimi për të ndaluar transmetimin dhe për të parandaluar përhapjen e mëtejshme. Është jetike që të gjitha vendet të jenë të përgatitura për të zbuluar me shpejtësi dhe për t’iu përgjigjur në kohë shpërthimeve të fruthit, të cilat mund të rrezikojnë përparimin drejt eliminimit të fruthit,” tha drejtori rajonal i OBSH-së për Evropën, Hans Kluge.
Sipas OBSH-së, pandemia Covid-19 ndikoi në reduktimin e imunizimit rutinë të fëmijëve në vitet midis 2020 dhe 2022.
Sipas saj, më shumë se 1.8 milionë foshnja nuk ishin vaksinuar kundër fruthit në këtë periudhë. OBSH tha se raste janë regjistruar në vendet ku fruthi është shpallur zyrtarisht i eliminuar si sëmundje endemike.
Në Shqipëri, rastet e konfirmuara i përkasin kryesisht grupmoshës nën 2 vjeç.
Instituti i Shëndetit Publik ju bën thirrje të gjithë prindërve të vaksinojnë fëmijët e tyre sipas kalendarit kombëtar të vaksinimit dhe udhëzimeve të ISHP-së për grupet që janë më të rrezikuara.
“Jo vetëm fëmijët, por edhe të rriturit që nuk janë vaksinuar ndaj fruthit apo nuk kanë marrë dy doza të vaksinës, duhet të vaksinohen. Vaksinimi ndaj fruthit është mbrojtja më e mirë për parandaluar fruthin dhe komplikacionet që vijnë prej tij. Për shkak se kjo periudhë e vitit sjell rritje të numrit të rasteve të infeksioneve respiratore dhe gripit, bëhet akoma më i rëndësishëm vaksinimi, për të parandaluar përhapjen e fruthit” – thuhet në një deklaratë të ISHP.
n.s. / dita
