Bashkë me pagën e muajit prill, pedagogët dhe punonjësit e tjerë të strukturave publike të arsimit të lartë do të marrin edhe rritjen e bërë nga qeveria, e cila shkon deri në 30 për qind.
Sikundër edhe është deklaruar më herët, nga kjo rritje, 20 për qind do të mbulohet nga të ardhurat e buxhetit të shtetit, ndërsa 10 për qindëshi i mbetur do të sigurohet nga të ardhurat e vetë universiteteve.
Tashmë është zbardhur në Fletoren Zyrtare edhe vendimi, në të cilin përcaktohet se sa do të jetë kufiri maksimal dhe ai minimal i pagave që do të marrin pedagogët bashkë me rritjen prej 30 për qindësh.
Kështu, paga e një profesori do të shkojë në 155 400 lekë me rritjen që do të mbulohet nga buxheti i shtetit, ndërsa kufiri maksimal i pagës do të jetë 180 960 lekë. Për lektorët kufiri minimal pas aplikimit të rritjes do jetë 116 040 lekë, ndërsa ai maksimal do jetë 135 005. Në vijim jepet e detajuar rritja në kufijtë minimalë dhe maksimal për të gjitha kategoritë e punonjësve në institucionet e arsimit të lartë publik.
Personeli i institucioneve të arsimit të lartë përbëhet nga personeli akademik, personeli ndihmësakademik dhe personeli administrativ.
Personeli i institucioneve të arsimit të lartë mund të jetë i punësuar me kontratë, me kohëzgjatje të pacaktuar ose të caktuar, si edhe me angazhim me kohë të plotë ose me kohë të pjesshme.
Personeli akademik në institucionet e arsimit të lartë kryen veprimtari të mësimdhënies, të kërkimit shkencor, shërbime për mbështetje dhe zhvillim të institucionit të arsimit të lartë, këshillim për studentët si dhe veprimtari të tjera.
p.k\dita
