Nëse SHBA vendos në Europë raketa me rreze të mesme dhe të shkurtër, Rusia do të kundërpërgjigjet. Paralajmërimin e ka bërë Vladimir Yermakov, drejtor i Departamentit të Mospërhapjes dhe Kontrollit të Armëve të Ministrisë së Jashtme ruse.
“Moratoriumi i njëanshëm i Rusisë për vendosjen e raketave tokësore me rreze të mesme dhe më të shkurtër lidhet drejtpërdrejt me atë që bën SHBA në këtë drejtim. Mos lini vend për ndonjë interpretim tjetër”, vuri në dukje ai në një intervistë me gazetarët rusë, kur u pyet nëse Rusia do të bënte funksionale armë të ngjashme në përgjigje të një hapi të tillë nga SHBA-të.
Yermakov thotë se konfrontimi aktual midis Rusisë dhe SHBA-së është shkaktuar nga Uashingtoni dhe përgjigjja duhet të jetë vendosja e armëve bërthamore në Bjellorusi.
“Në përgjithësi, duke pasur parasysh aspektet e ngecjes aktuale midis vendeve tona, e cila u shkaktua nga Uashingtoni, Rusia duhet të ndërmarrë disa hapa në fushën strategjike që heqin, ose të paktën zvogëlojnë, pabarazitë ekzistuese dhe ato në zhvillim. Sipas mendimit tim, të tilla hapa përfshijnë vendimin për vendosjen e armëve bërthamore ruse në Bjellorusi në përgjigje të praktikës së NATO-s të ‘misioneve të përbashkëta bërthamore’, si dhe tërheqjen e mundshme të ratifikimit tonë të Traktatit Gjithëpërfshirës të Ndalimit të Testeve Bërthamore (CTBT), që synon të pasqyrojë qëndrimin e marrë nga SHBA”, theksoi Yermakov.
Presidenti rus, Vladimir Putin, ka paralajmëruar se Rusia mund të revokojë ratifikimin e Traktatit Gjithëpërfshirës për Ndalimin e Testeve Bërthamore, pas vendimit të SHBA-ve për të mos e hedhur një hap të tillë. /Respublica
p.c. / dita
