Jo vetëm mungesa, por edhe niveli i lartë i kalciumit në gjak bëhet shkak për probleme të shumta shëndetësore. E njohur ndryshe si “Hyperkalcemia”, kjo është një gjendje në të cilën organizmi ka vlera të kalciumit në gjak, më shumë sesa vlerat e lejueshme. Vlerat e lejuara llogariten midis 9 dhe 10.5 mg/dl, ose e shprehur në një sistem tjetër referimi midis 2.2 dhe 2.6 mmol/L. Kalciumi kryen funksione të rëndësishme për organizmin dhe kur nivelet e tij në gjak, janë më të larta se ç’duhet të jenë, atëherë vështirësohet edhe puna e tij.
Nëse hyperkalcemia është e butë mund të mos kemi prezantim klinik, nëse ajo thellohet, të parat që vuajnë janë veshkat. Konkretisht kemi dhimbje mesi në nivel të veshkave, urinim të shpeshtë, ndjenjën e etjes, dhimbje barku, ulje të oreksit, të përziera, të vjella, kapsllëk. Më tej, nivelet e larta të kalciumit mund të shkaktojnë probleme të kockave si dhimbje, përkulje të supeve, të shpinës, fraktura. Po ashtu këto gjendje mund të shoqërohen edhe me simptoma psikologjike si depresion, dobësim të kujtesës dhe nervozizëm. Hyperkalcemia konsiderohet urgjencë mjekësore kur pacientët janë të prekur nga një lloj kanceri. Rastet e rënda mund të çojnë në formimin e gurëve në veshka, pamjaftueshmërinë e punës së veshkave (insuficienca renale).
Nivelet e kalciumit maten nëpërmjet testeve specifike të gjakut. Pasi gjenden nivele të larta të tij mjeku kërkon ekzaminime të tjera për të gjetur shkakun e hyperkalcemisë. Duke trajtuar shkakun bëjmë trajtimin e duhur të hyperkalcemisë. Prandaj ky është një moment që i takon vetëm mjekut, çka do të thotë se duhet të hiqni dorë nga praktika e gabuar e marrjes së kalciumit nëpër farmaci, pa verifikuar më parë nëpërmjet testeve përkatëse gjendjen reale të kalciumit në gjak.
Një ndër këshillat që rekomandojnë bluzat e bardha për përkujdesjen që duhet të keni, është ajo e përdorimit të sa më shumë ujë dhe lëngjeve në jetën e përditshme, për të parandaluar formimin e gurëve në veshka. Sigurisht që sasia e lëngjeve duhet të jetë e shpërndarë gjatë gjithë ditës. Pra pini shpesh dhe nga pak deri në 2-3 litra në ditë për të siguruar një punë të rregullt të veshkave. Pirja e duhanit gjithashtu luan rol në nivelet e larta të kalciumit në gjak. Prandaj duke mos pirë duhan keni vetëm përfitime shëndetësore. Ushqehuni në mënyrë të shëndetshme dhe të shumëllojshme, duke i kushtuar më shumë rëndësi proteinave bimore se sa atyre shtazore. Pra përdorni sa më shumë perime dhe fruta të freskëta. Kryeni aktivitet fizik në raport me gjendjen tuaj shëndetësore për të mbajtur në tonusin e duhur sistemin muskulo-skeletik.
p.k\dita
