Trajtimi i sëmundjeve të brendshme tashmë do të bëhet edhe pranë Spitalit Universitar të Traumës në Laprakë.
Edhe në këtë qendër spitalore universitare është ndërtuar spitali i ri intern, me një kapacitet prej 60 shtretërish çka do të shërbejë për trajtimin e sëmundjeve të brendshme, duke shmangur kështu dërgimin e pacientëve drejt klinikave të QSUT, për të marrë kujdesin e duhur mjekësor që nevojitet për këto patologji.
Në klinikën e re të hapur, për herë të parë do të ofrohet edhe shërbimi i konsultave ambulatore, duke shpërndarë kështu edhe fluksin e dyndjes së pacientëve drejt strukturave të tjera spitalore.
“Pas përfundimit të spitalit në QSUT, tashmë kemi një vepër tjetër në shëndetësi, që do të ndryshojë tërësisht gjithë mënyrën e shërbimit dhe do të ofrojë shërbime më cilësore për pacientët që shtrohen për patologji të brendshme, trajtimi i të cilave do të bëhet edhe këtu në Spitalin Universitar të Traumës. Nga ana tjetër ne për herë të parë kemi edhe një investim, sa i përket shërbimit të konsultave që do të ofrohet në këtë godinë. Shërbimi i konsultave është shumë i rëndësishëm të merret në zona të dedikuara për të shmangur ato lëvizje brenda në spital, dhe për të siguruar që të gjithë mjekët të kenë kushte më të mira pune për të ofruar ekspertizën e tyre dhe konsultat e tyre ambulatore, si dhe të kemi edhe një sistem sa më efektiv sa i takon shtrimeve të planifikuara”, deklaroi ministrja e Shëndetësisë dhe Mbrojtjes Sociale, Ogerta Manastirliu, gjatë inspektimit të Spitalit të ri Intern që do të funksionojë tek Trauma.
Sipas saj, Spitali Universitar i Traumës, ka mbajtur një volum pune shumë të madh duke nisur nga momenti i pandemisë. “Ne kemi arritur që tashmë trauma të mos presë vetëm urgjencat e kësaj natyre, por edhe urgjencat kirurgjikale. Do të vijojmë që të kemi një shpërndarje të urgjencës kirurgjikale mes QSUT, Spitalit Universitar “Shefqet Ndroqi”, si dhe Spitalit Universitar të Traumës”, tha ndër të tjera Manastirliu.
Bashkë me investimet për përmirësimin e infrastrukturës shëndetësore, ministrja shtoi se do të vijohet edhe me mbështetjen për stafet mjekësore me rritjen e pagës 500 dollarë për mjekët specialistë dhe 7 për qind për të gjithë stafet e tjera mjekësore. Ndërkohë që gjatë vitit të ardhshëm pritet që rritja e targetuar e pagave të bëhet edhe për mjekët e familjes dhe infermierët.
p.k\dita
