Top Channel mëson nga disa burime të pavarura nga njëri-tjetri, se Shqipëria është përfshirë në një operacion, që besohet të jetë evakuim potencial i shtetasve të saj që jetojnë apo punojnë në Izrael.
Gazetari Muhamed Veliu raporton se avioni i një kompanie shqiptare ka mbërritur paraditen e sotme në Izrael dhe ka nisur udhëtimin drejt Tiranës në orën 16:00. Ky avion charter është nisur nga aeroporti Tel Avivit “Ben Gurion” dhe pritet të mbërrijë rreth orës 17:54 minuta në Tiranë.
Për momentin nuk jepen të dhëna sa është numri i shqiptarëve në bordin e këtij fluturimi special Tel Aviv-Tiranë, për vetë ndjeshmërinë e çështjes.
Mes Izraelit dhe Shqipërisë apo anasjelltas nuk ka linjë ajrore direkte dhe fluturimi mund të ndiqet fare lehtë në aplikacionet e gjurmimit të avionëve Flight-Radar.
Top Channel sjell fotot që tregojnë ecurinë e këtij udhëtimi Tel Aviv-Tiranë.
Ky evakuim i shtetasve shqiptarë me këtë avion charter ndodh në një kohë kur shumë kompani fluturimi kanë nisur anulimet e fluturimeve drejt Izraelit apo nga aeroportet e këtij vendi.
p.c. / dita
