Kreditë për konsum, jo për blerje shtëpie apo investime janë rritur me 25% vitin që lamë pas. Raporti më i fundit i Bankës së Shqipërisë tregon një rritje rekord të këtij segmenti të kredisë e përllogaritur në 47.2 miliardë Lekë.
Por ekspertët paralajmërojnë se një ekonomi që mbështetet gjithnjë e më shumë te kreditë për konsum mund të përballet me vështirësi në rast të një goditjeje financiare.
“Qytetarët tregojnë një siguri tek të ardhurat e tyre për të pasur një vazhdueshmëri pagimi. Deri para pak muajsh kanë qenë më të lehta për tu aksesuar sepse nuk kanë pasur kushte shumë.
Qytetarët e vetmja zgjidhje që gjejnë janë ose overdraftet e bankës ose kreditë e buta”, thotë eksperti i ekonomisë Vilodi Danaj.
Teksa qytetarët përpiqen të përballojnë sfidat përmes bankave, sa afatgjatë është kjo zgjidhje?
“Kreditë konsumatore sigurisht që po bëhen rrezik për sektorin kredidhënës. Mund të kthehen në një problem që të përkeqësojnë kushtet e jetesës së qytetarëve duke i bërë që të kenë kosto shumë herë më të larta nga ato që ata mund të kishin parashikuar”, shprehet eksperti.
Ekspertët këshillojnë kujdes në menaxhimin e buxhetit familjar dhe rishikim të kujdesshëm të mundësive të huamarrjes.
