Shënjestra e atentatit nga grupi i dyshuar i të shumëkërkuarit Ervis Martinaj, ky i zhdukur pa gjurmë prej 8 gushtit 2022, Fatjon Murati, besohet se po fshihet në Turqi pas arratisjes disa orë para sulmit në “Don Bosko”, mbrëmjen e 12 marsit. Në Gjykatën e Tiranës u shty dje edhe seanca që ishte parashikuar për të dhe Kristjan Gjinin, të akuzuar për armëmbajtje pa leje për arsenalin e armëve, që iu gjet në muajin korrik të vitit të kaluar, te zona e “liqenit të thatë’. Shkak për shtyrjen u bë mungesa e avokates mbrojtëse e Gjinit, teksa ishte parashikuar që Prokuroria të jepte konkluzionet. Burime bëjnë me dije se disa javë më parë Fatjon Murati kishte kërkuar nga prokuroria leje 1 mujore, që të dilte në orën 08:00 të mëngjesit nga shtëpia dhe të kthehej në orën 20:00, për arsye shëndetësore, pasi do të kryente disa ekzaminime, kërkesë që i është refuzuar.
Gjykata në mënyrë të papritur ia kishte zbutur masën e sigurisë, nga arrest në burg, në arrest shtëpiak, edhe pse dyshohej për pjesëmarrje në masakrën e Fushë-Krujës, më 17 korrik 2022, me 3 të vrarë, anëtarë të grupit të Martinajt. Fatjon Murati, pas ngjarjes kriminale të Don Boskos, ku mbeti e vrarë Mimoza Paja, 58 vjeçe, u lënduar mbesa e saj e mitur dhe u plagosën 5 të tjerë, nuk u gjet në banesën teksa ishte në arrest shtëpie. Ai rezulton të ketë ikur nga vendi po atë ditë, fillimisht përmes pikës kufitare të Morinës për në Prishtinë, e më pas në drejtim të Turqisë. Në këtë udhëtim është ndihmuar sipas verifikimeve, nga Endrit Dokle dhe kunati i tij, Gentian Reçi, të cilët janë kthyer nga Maqedonia pasi e lanë në Prishtinë.
Ishin të njëjtët persona me të cilët u kap në makinën e blinduar, 8 tetorin e vitit të kaluar, teksa ishte i shumëkërkuar për bazën e armatimit dhe pjesëmarrje në ngjarje kriminale. Murati ka kaluar lehtësisht në kufi në fundjavë, pasi sipas marrëveshjes lëvizja e qytetarëve është e lirë. Murati është kontrolluar sipas rregullave dhe në TIMS nuk është shfaqur asgjë për masën e tij. Ish-boksieri dyshohet se ka pasur informacione se ndaj tij do të kryhej një sulm dhe ndaj është mbrojtur nga miqtë e tij duke u ndihmuar që të largohej nga vendi. Autorët në këto rrethana, zgjodhën hakmarrjen ndaj familjes së tij, por vranë njerëz të pafajshëm.
