Gjykata e Lartë ka vendosur të shtyjë seancën për Dritan Dajtin, i akuzuar për një sërë veprash të rënda penale si dhe autor i vrasjes së katër efektivëve të policisë në Durrës në vitin 2009.
Seanca është shtyrë në datën 11 qershor me gjyqtar Artur Kalanë. Gjyqtari Medi Bici është zëvendësuar pasi ka rezultuar se ai e ka gjyquar Dajtin në një proces në vitin 2003.
Ai u dënua nga shkalla e parë me burgim të përjetshëm për vrasjen e 4 efektivëve Kastriot Feskaj, Altin Dizdari, Sajmir Duçkollari dhe Fatos Xhani, gjatë një operacioni për arrestimin e tij.
Në shkurt të vitit 2019 Gjykata e Apelit e Krimeve të Rënda pranoi kërkesën e Dajtit për gjykim të shkurtuar duke caktuar ndaj këtij të fundit 25 vite burg.
Ndërkohë, vendimi i dhënë nga pesë gjyqtaret e Apelit, Fuat Vjerdha kryetar, Lindita Hoxha, Aleks Nikolli, Petrit Aliaj dhe Skender Damini është ankimuar nga Prokuroria e Apelit e Krimeve të Rënda, e cila kërkon rikthimin e dënimit me burgim të përjetshëm.
b.m/dita
