Ish-atleti i kërcimit së larti, amerikani Dick Fosbury, kampioni olimpik i Lojërave Meksikë 1968, u shua sot në moshën 76-vjeçare. Lajmin e konfirmoi agjenti i tij, duke thënë se sportisti që revolucionarizoi kërcimin së larti me shpatulla, u shua në gjumë. “Me zemër të thyer njoftoj se miku im Dick Fosbury, vdiq në paqe teksa flinte, në orët e para të mëngjesit, pasi ra përsëri në problemet shëndetësore të Linfomisë, nga e cila vuante”, shkruante agjenti Ray Schulte në Instagram. Më tej shtonte se “miku i të gjithëve ishte një legjendë”.
I lindur në Portland (Oregón), më 1947, Fosbury u shndërrua në një nga atletët më influencues të historisë së atletikës botërore, me teknikën e tij të veçantë të viteve 60-të. Mbahet mend për kërcimin e tij me kurriz, pra duke përdorur shpatullat dhe me fytyrë sipër në hedhje, një teknikë që përdoret nga të gjithë atletët e kësaj disipline ditët e sotme. I gjatë 190 cm, ai rrotullonte të gjithë trupin në kërcim dhe më pas zhytej në tapetin e sfungjertë.
Teknikën e nisi ta mësonte që kur ishte në shkollë dhe me garat e tij i siguroi shumë medalje vendit. Në Lojërat e Meksikës fitoi medaljen e artë olimpike, duke kërcyer 2,24 metra lartësi në provën e tretë, një rekord olimpik ky në atë kohë.
