Prokuroria e Elbasanit ka mbyllur hetimet për Seit dhe Kreshnik Manahasa dhe kërkon 25 vite në total për të dy (15 dhe 10 vite). Kushërinjtë u vunë në pranga pasi akuzohen se morën peng një biznesmen dhe punonjësen e tij dhe i mbyllën në një magazinë për orë të tëra. Bëhet fjalë për mbajtjen peng të biznesmenit Gani Moka. Gjatë hetimeve është provuar se në këtë pengmarrje kanë marrë pjesë Seit Manahasa dhe kushëriri i tij, Kreshnik Manahasa (Muhollari), të cilët tashmë janë marrë të pandehur dhe dërguar në gjykatë. Ata akuzohen për veprën penale të “shtrëngimit me anë të kanosjes ose dhunës për dhënien e pasurisë”, të kryer në bashkëpunim, “vjedhja me dhunë” e kryer në bashkëpunim, “heqja e pa ligjshme e lirisë” e kryer në bashkëpunim dhe “ngacmimit seksual”.
Ngjarja ndodhi dy vite më parë, në maj të vitit 2021. Biznesmeni Moka dhe punonjësja e tij, F…, kishin ndaluar në autostradën Peqin-Elbasan, dhe teksa qëndronin buzë lumit Shkumbit, Manahasa e kushëriri i tij u janë afruar dhe i kanë marrë peng. Ata i kanë dhunuar e kërcënuar, madje me vajzën kanë tentuar të kryejnë edhe marrëdhënie seksuale. Në fund i kanë filmuar dhe kanë kërkuar që biznesmeni tu jepte 20 mijë euro, në të kundërt videon do t’ua hidhnin në ‘Youtube’. Biznesmeni ka pranuar dhe ata i kanë liruar në mënyrë që t’u dërgonin paratë. Por, pas lirimit, teksa udhëtonte drejt Elbasanit, Moka ka telefonuar djalin e tij në Tiranë dhe i ka shpjeguar se çfarë kishte ndodhur me dy persona të panjohur si dhe një mikun e tij, një biznesmen tjetër ndërtimi, i cili i kishte thënë të shkonte te Drejtoria e Policisë Elbasan, pasi drejtuesit e policisë ishin njoftuar për ngjarjen dhe po i prisnin për të dëshmuar. Pas kallëzimit, u realizua dhe operacioni që vuri në pranga dy kushërinjtë.
m.b./dita
