Sindroma e syrit të thatë është një gjendje që shkaktohet nga mungesa kronike e lubrifikimit dhe lagështisë në sipërfaqen e syrit. Pasojat e kësaj gjendjeje mund të variojnë nga një acarim i lehtë, por i vazhdueshëm i syve, deri në inflamacion (infeksion) të shprehur.
Të dhënat e raportuara nga strukturat shëndetësore tregojnë se ky sindrom prek më shumë femrat në krahasim me meshkujt. Mosha më e zakonshme në të cilat shfaqet ky problem është mbi 40 vjeç.
Përveç ndikimit në shëndetin e syve, ky problem mund të shkaktojë përkeqësim të mirëqenies së përgjithshme, të shëndetit emocional, si edhe të funksionimit social.
Sindromi i syrit të thatë është një çrregullim mjaft i zakonshëm që rezulton së pari nga zvogëlimi i prodhimit të lotit, nga avullimi i tepruar i lotit, apo edhe anomali të prodhimit të mukusit dhe lipideve që pengojnë avullimin e lotit.
Prodhimi i dobët i lotit nga gjëndrat e lotit mund të jetë rezultat i moshës, ndryshimeve hormonale ose sëmundjeve të ndryshme autoimune, si për shembull artriti reumatoid, lupusi eritematoz sistemik, morbus Sjorgen.
Medikamente të ndryshme kur përdoren për periudha të gjata, të tilla, si: kontraceptivët oralë, medikamentet antidepresive, antihistaminikët, mund të ndikojnë në zvogëlimin e prodhimit të lotit. Nëse qepallat nuk mbyllen plotësisht, sytë mund të thahen si rezultat I avullimit të lotit. Disa kushte shëndetësore si për shembull paraliza e quajtur Bell, e bëjnë të vështirë mbylljen e syve duke rritur mundësinë e avullimit të lotit.
Mund të ndodhë gjithashtu prodhimi jonormal i mukusit nga konjuktiva (shtresa e bardhë e syve). Kjo mund të ndodhë nga djegiet kimike ose për shkak të sëmundjeve të ndryshme autoimune. Ky prodhim jonormal çon në përhapjen e dobët të lotëve mbi sipërfaqen e syrit. Sipërfaqja e syrit mund të thahet dhe madje të dëmtohet në këto raste edhe përkundër sasisë së mjaftueshme të lotëve. Në qepalla ndodhen gjëndra specifike yndyrore që prodhojnë lipidet (yndyrat, vajra) e nevojshme, të cilat edhe këto si mukusi mbrojnë sipërfaqen e syve dhe pengojnë avullimin e lotëve. Nëse këto gjëndra bllokohen ose infektohen, atëherë nuk do të kemi lipide mjaftueshëm, pra edhe loti do të avullojë e më shpejt dhe mbrojtja e syve do të jetë më e dobët.
Lidhur me simptomat, pacienti mund të përjetojë në këto raste një ndjenjë gërvishtjeje, djegie, kruajte, skuqje të syve (konjuktiviti), vizion të paqartë, ndjesinë e trupit të huaj në sy, apo edhe ndjeshmëri ndaj dritës. Këto simptoma, duket së përkeqësohen më tepër në klimë të thatë e me erë, në temperatura të larta dhe lagështi më të ulët. Simptomat mund të përkeqësohen gjithashtu edhe me përdorimin e zgjatur të syve (leximi, televizioni, kompjuteri).
Ky problem duhet trajtuar nga mjekët okulistë që bëjnë vlerësimin individual të situatës shëndetësore dhe përcaktojnë mjekimin e duhur që duhet të merrni. Për të shmangur rëndimin e gjendjes, nuk duhet që të abuzoni me marrjen e qetësuesve pa këshillën e mjekut specialist.
p.k/dita
