Sindromi i “supit të ngrirë” është një gjendje ku zakonisht njëra nga shpatullat bëhet e dhimbshme dhe e ngurtë në lëvizje.
Lëvizjet e shpatullave bëhen përgjithësisht të reduktuara dhe nganjëherë plotësisht të ngurta. E gjithë kjo mendohet të jetë për shkak të formës së “dhëmbëzave” që formohen në kapsulën (mbështjellësen) e shpatullave. Kjo situatë mund të zgjasë dy, deri në tre vjet.
Më së shpeshti kjo sëmundje ndodh rreth moshës 40-65 vjeç dhe është më e zakonshme te gratë, se sa te burrat. Gjithashtu më të ndjeshëm janë personat që vuajnë nga diabeti, gjëndrat tiroide, apo edhe sëmundje të tjera kronike. Duhet theksuar se sindromi i supit të ngrirë nuk është shprehje e inflamacionit të supit (artritit) dhe gjatë kësaj kohe nuk preken nyje të tjera artikulare.
Shkaku se pse ndodh ky sindrom nuk është ende plotësisht i qartë. Dihet vetëm që në këto raste kemi trashje të kapsulës artikulare. Kapsula është një ind i hollë që mbulon dhe mbron shpatullën. Arsye të ndryshme shkaktojnë trashjen e kapsulës duke u shoqëruar me kuadrin e plotë klinik të këtij sindromi, të cilin e përshkruam më lart.
Simptomat tipike janë dhimbja, ngurtësia dhe kufizimi i diapazonit të lëvizjeve të supit. Simptomat zakonisht kalojnë në tre faza.
Faza e parë është ajo e dhimbjes, që përbën edhe simptomën e parë të këtij problemi. Zakonisht dhimbja është më e keqe gjatë natës, si edhe kur shtrihemi në anën e prekur.
Faza e dytë është faza e ngrirjes dhe që zgjat 4-12 muaj. Dhimbjet në këtë fazë lehtësohen gradualisht por ngurtësimi dhe kufizimi i lëvizjeve persistojnë akoma por edhe mund të përkeqësohen.
Faza e tretë, ose “shkrirja“ është faza e rimëkëmbjes. Kjo fazë zgjat zakonisht një deri në tre vjet. Dhimbjet dhe ngurtësimi shkojnë gradualisht, po ashtu edhe lëvizjet kthehen gradualisht drejt normales. Simptomat klinike shpesh cenojnë aktivitetin e përditshëm jetësor si veshjen, ushqyerjen, ngarjen e makinës apo edhe punë të ndryshme. Simptomat në përgjithësi zgjasin rreth 2-3 vjet dhe në një pakicë të rasteve mund të zgjasin edhe disa vite.
Në përcaktimin e diagnozës ka rëndësi përjashtimi i shkaqeve të tjera që kanë simptoma të ngjashme. Për këtë ndihmojnë ekzaminimet klinike, laboratorike dhe radiologjike sipas udhëzimeve të mjekut specialist.
p.k\dita
