Në një komunikimin për mediat, Ministri i Mbrojtjes, Niko Peleshi ka bërë me dije se duke nisur nga pasditja e kësaj të hëne, e deri në fund të javës, në pjesën veri-perëndimore të vendit do ketë reshje intensive, të cilat mund të sjellin fryrje të përrenjve, ccka mund të shkaktojë përmbytje lokale.
“Duke filluar nga sot pas mesditës, përgjatë javës, deri në fund të javës, në pjesën veri-perëndimore të vendit, rreth Shkodrës, do kemi rritje të intensiteti të reshjeve. Të shmangim emergjenca që në këtë rast mund të jenë lokale. Jemi në një stinë që nuk favorizon përmbytje. Një lajm tjetër i mirë, është mirëmenaxhimi i Kaskadës. Situata rëndohet vetëm kur kemi reshje me intensitet të lartë dhe kur jemi të detyruar të bëjmë shkarkime të kontrolluara në gjithë Kaskadën e Drinit. Shkarkimet në këtë rast do jenë zero”, tha Peleshi.
Teksa vuri theksin te lajmi i mirë i menaxhimit të Kaskadës së Drinit, ministri Peleshi paralajmëroi bashkitë që të mobilizohen për të parandaluar përmbytjet dhe u ka bërë thirrje qytetarëve që të shmangin lëvizjes në rrugët që kërcënohen nga përrenjtë.
“Intensiteti i përqendruar në kohë në lokalitet në veri-perëndim mund të shkaktojë fryrje të përrenjve dhe ndonjë situatë që mund të bëhet shkak për përmbytje lokale. Shpresojmë që kjo të parandalohet, por duhet të jetë mobilizim i bashkive në radhë të parë, të shmangim lëvizjet në rrugët që kërcënohen nga përrenjtë dhe të sinjalizojnë në kohë nëse ka rrëshqitje apo situatë ku duhet ndërhyrja e strukturave të emergjencave”, deklaroi Peleshi.
p.k\dita
