Megjithëse Ministria e Financave i kishte kërkuar Prokurorisë (Hacienda) që të hetonte pagesat e dyshuara për korrupsion të Barcelonës, në drejtim të ish-zv/presidentit të Komitetit të Arbitrave Spanjë, Jose Maria Negreira, për të ndikuar në rezultate, kjo së fundmi duket se nuk është provuar dot. Megjithë skandalin që ka shpërthyer, pagesat deri tani, nga viti 2011 dhe deri më 2018, me vlerë 7,5 mln euro në total, rezultojnë se janë kryer thjesht si konsulencë dhe informim, që të mbrohej nderi i skuadrës në tavolinën e Komitetit të Arbitrave, përballë ndikimit të rivalëve të përjetshëm të Real Madrid dhe akuzave të përhershme se pjesa më e madhe e gjyqtarëve ishin mbështetës të ‘los blancos”. Ditën e sotme, mediat sportive spanjolle, kryesisht “Marca” dhe “AS”, raportuan se hetuesit e Hacienda nuk gjetën dot prova në dokumentacione, përgjime dhe telefonata, se Negreira ishte paguar për të korruptuar arbitrat e ndeshjeve.
Gjithashtu edhe rezultatet e ballafaquara sipas kësteve të pagesave vjetore, nuk konkluduan një gjë të tillë, për më tepër kur Barcelonës iu hoqën dukshëm kampionatet e vitit 2012 dhe 2017, duke penalizuar hapur katalanasit në shumë ndeshje. Kurse Gjykata ka mbledhur të gjitha dokumentacionet e pagesave fiskale të periudhës 2016-2019 të agjencisë DASNIL 95 të ish-gjyqtarit Negreira. Financat kërkuan hetimin e ish-presidentëve të Barcelonës si të dyshuar për korrupsion, Jose Maria Bartomeu dhe Sandro Rosell, së bashku me sekretarët ekonomikë të klubit, Oscar Grau dhe Carlos Soler.
Por pas disa muajsh hetimesh dhe marrjesh në pyetje, nuk u gjet asnjë provë konkrete për të korruptuar gjyqtarët e ndeshjeve në favor të katalanasve, nëpërmjet pagesave që derdheshin te Negreira.
