Stiven Toshkësi është 20-vjeçari që ndërroi jetë sot pas një sherri banal me thika me dy 18-vjeçarë, Ensi Maze dhe Axel Hoxhaj.
Maze është arrestuar, ndërsa autori tjetër është në kërkim nga Policia. Ngjarja e rëndë ndodhi rreth orë 00:35 në rrugën “4 Dëshmorët”, në afërsi të gjimnazit “Partizani”, Tiranë.
Shkak i sherrit mes të rinjve duket se ka qenë e dashura e viktimës, pasi njëri prej autorëve ngacmonte të dashurën e 20-vjeçarit. Të rinjtë ishin konfliktuar gjithashtu për këtë shkak edhe dy javë më parë në rrugën e Elbasanit në Tiranë.
Por si ndodhi sherri që përfundoi në tragjedi në orët e para të mëngjesit sot?
Mësohet se viktima sapo kishte lënë punën kur është përballur me dy 18-vjeçarët, të cilët e kishin qëlluar pas shpine, duke i shkaktuar plagë të rënda.
Siç shihet dhe nga pamjet, viktima pasi është goditur me thikë ka vrapuar në drejtim të banesës.
Ai është ndjekur deri në një pikë të rrugës nga një prej autorëve, i cili më pas është kthyer dhe është larguar në drejtimin tjetër.
20-vjeçari është transportuar me urgjencë në spital por nuk ka mundur t’i mbijetojë plagëve të marra.
