Mbyllet në barazim 1-1 dhe me tension sfida e parë gjysmëfinale të Kupës së Italisë, Juventus-Inter. Në “Allianz Stadium” u zhvilluar një përballje mjaft e ekuilibruar, por që mori “flakë” në fund, pa golit të barazimit të shënuar nga Lukaku me penallti.
Karton i kuq për Lukakun dhe pas përfundimit të takimit edhe për Cuardradon dhe Handanovicin. Që në minutën e katërt dha shkëndijën e parë Angel Di Maria me një goditje që shkoi ngjitur me shtyllën. Kishte pretendime për 11-metërsh nga futbollistëte Interit në minutën e 35, por edhe pas konsultimit me sistemin VAR, gjyqtari Davide Massa vijoi lojën.
Edhe pjesa e dytë ishte shumë e luftuar nga të dyja skuadrat, me lojën që mori tjetër rrjedhë në minutë në 83-tën kur Cuadrado zhbllokoi rezultatin. U duk se Juventusi e kishte në dorë fitoren, por në minutën e pestë shtesë, një gafe e Bremer (preku topi me dorë) i dha mundësi Lukakut të shënonte golin e barazimit nga pika e bardhë. Në sekondat e mbetura të sfidës nuk mund të flitej më për lojë: pati përplasje mes futbollistëve të të dyja skuadrave, madje edhe pas vërshëllimës së trefishtë të kryesorit, që u detyrua të nxirrte tre kartonë të kuq. /Supersport/
