Media afër Berishës kanë përhapur sërish sot raportime mbi një kontroll sipas tyre, të banesës së kryebashkiakut të Tiranës.
Burime nga SPAK bëjnë me dije se nuk është ushtruar asnjë kontroll i banesës së tij.
Të pyetur nga DITA të njëjtat burime bëjnë me dije se ka hetime në vijim të lidhura me verifikimin e pasurisë së z.Veliaj. Fillimi i këtyre hetimeve është bërë i ditur prej kohësh.
Bashkëshortja e kreut të Bashkisë, znj. Ajola Xoxaj ka dorëzuar sot telefonin sipas kërkesës së BKH dhe ka shoqëruar agjentët në ambjentet e zyrës së studios Harabel, një studio arti, subjekt kontrolli.
Këto hetime vijojnë sipas hapave që njeh ligji, deri në përfundim të të cilave, mediat, pavarësisht kaheve dhe politikave editoriale, duhet të kenë parasysh mbi të gjitha prezumimin e pafajësisë – vijoi burimi.
Ndërkohë, lajmet konfuze në portale dhe postimet në rrjete sociale janë të shumta lidhur me rastin.
Aktivistja e njohur Migena Aleksi, ish- gazetare dhe publiciste shkruan se nevojitet një edukim i publikut për njohjen e informacionit dhe ndarjen e raportimeve profesionale nga qëndrimet bajate me natyrë politike.
“Protestat e zbehta por të dhunshme para Bashkisë që vijojnë pavarësisht pjesëmarrjes qesharake, si dhe sulmet thuajse të përditshme politike në mediat afër Berishës kanë synuar dhe synojnë në vijimësi dekurajimin e një prej institucioneve më të rëndësishme të shërbimit ndaj qytetarëve që prodhon vazhdimisht mbështetje dhe miratim publik në Tiranë, si dhe goditjen personalisht të Veliajt, një nga makineritë elektorale më të fuqishme të PS-së” – shkruan publicistja e njohur në rrjetet sociale.
n.d. / dita
