Fazën e dytë të konkurrimit për pranimet e reja në programet e ciklit të tretë të studimeve “Specializimeve afatgjata në mjekësi” do ta vijojnë 355 kandidatë. Me përfundimin e afateve të pranimit të kërkesave, Fakulteti i Mjekësisë, ka shpallur listën e kandidatëve që kanë aplikuar për të vijuar studimet në këtë cikël për vitin akademik 2022-2023.
Nga 355 aplikimet e regjistruara, 27 prej tyre janë në garë për kuotat e transferimeve, ndërsa pjesa tjetër garojnë për të vijuar studimet për herë të parë gjatë këtij viti akademik.
Në fazën e dytë të konkurrimit përfshihet testimi i informatizuar që do të zhvillohet në Qendrën e Shërbimeve të Arsimit, sipas një kalendari të detajuar datash për secilin specialitet mjekësor, i cili do të zbardhet gjatë këtyre ditëve.
Shpallja e fituesve do të bëhet nga pikët finale që çdo kandidat do të sigurojë nëpërmjet vlerësimit të mesatares së studimeve, si dhe pikëve të fituara nga zhvillimi i testit të informatizuar.
Sipas skemës së përcaktuar, vlerësimi do të bëhet me një sistem prej 1000 pikësh. Këto pikë konvertohen në 30 për qind, që i përkasin notës mestarë (300 pikë), ndërsa 70 për qind do të jenë pikët e siguruara nga testimi i informatizuar (700 pikë).
Pas përfundimit të provimit, Komisioni i Vlerësimit do të shpallë listën e kandidatëve të kualifikuar, duke i renditur sipas pikëve kumulative në rend zbritës, ku kandidati i fundit duhet të ketë, jo më pak se sa 380 pikë . Zgjedhja e programit të specializimit bëhet nga vetë kandidati brenda dy ditësh nga shpallja e rezultateve finale. Të parët në përzgjedhje do të jenë kandidatët që kanë numrin më të lartë të pikëve të fituara në të gjithë procesin e konkurrimit.
