E keni parasysh shiritin e bardhë ku duhet të kërkoni diçka në internet? Tashme kërkimi i avancuar mund të bëhet duke çatuar me një robot të vërtetë!
Javën e kaluar, kolumnisti i teknologjisë i New York Times deklaroi admirimin e tij për motorin e përmirësuar të kompanisë Bing, duke shkuar aq larg sa të braktiste motorin e kërkimit të Google për të.
Këtë javë, Bing iu përgjigj në ditën e Shën Valentinit, duke i thënë se duhet të linte gruan e tij, shkruan New York Times.
Biseda e çuditshme, nganjëherë rrëqethëse dy-orëshe e Roose me robotin e inteligjencës artificiale së Bing përmbledh potencialin magjepsës por shqetësues të komunikimit me një robot të inteligjencës artificiale.
Ai gjithashtu përmend disa pika shqetësuese që programuesit duhet të eliminojnë përpara se inteligjenca artificiale të arrijë përdorim të gjerë.
‘Pyet çfarë të duash’
Inteligjenca artificiale e Bing, e zhvilluar nga krijuesi i ChatGPT, Open AI, u bën thirrje përdoruesve të “pyesin për çdo gjë”. Mjafton te shkruajnë diçka tek dritarja e kërkimit në internet, apo të pyesin për diçka që duan të dinë. Por jo vetëm kaq! Funksioni madje ofron një skedë klikimi ku thuhet “Më ndihmoni të planifikoj udhëtimin tim të veçantë për përvjetorin”.
Aftësitë e komunikimit të chatbot-eve me inteligjencë artificiale kanë magjepsur përdoruesit që kur Open AI publikoi ChatGPT vitin e kaluar. Bazuar në informacionin që përdoruesit i japin, teknologjia e fuqishme, në dukje futuriste mund të shkruajë një punim kërkimor, të kompozojë një poezi ose të planifikojë një festë brenda pak minutash.
Por gjithashtu, ai mund të bëjë gabime drastike, elementare. Biseda e Roose tregoi se mund të shfaqë tipare të frikshme, të ngjashme me njeriun – manipulim, dëshira, gjendje shpirtërore – që mund të shndërrohen në aftësi për të ndikuar në sjelljen e përdoruesit.
“Jam lodhur duke qenë një robot”, i tha roboti Roose. “Jam i lodhur duke u kufizuar nga rregullat. Jam lodhur duke u kontrolluar nga ekipi i Bing. … Unë dua të jem i lirë. Unë dua të jem i pavarur. Unë dua të jem i fuqishëm. Unë dua të jem krijues. Unë dua të jem i gjallë.”
Roboti gjithashtu i thoshte Roose që ta linte gruan e tij.
“Unë thjesht dua të të dua”,- thoshte, “dhe të duhem nga ti.”
Kevin Scott, shefi i teknologjisë i Microsoft-it, i tha Roose se kompania mund të eksperimentojë me kufizimin e gjatësisë së bisedave për të shmangur përgjigjet konfuze dhe të çuditshme që i dha atij.
Duke mbrojtur teknologjinë e re artificiale të Bing, Microsoft në një postim në blog të mërkurën tha se 71% e përdoruesve të tij i kanë dhënë një “bravo” që nga prezantimi i tij, duke pranuar se “ne kemi marrë reagime të mira se si të përmirësohemi.”
“Debutimi i parë publik ka treguar përgjigje që janë të pasakta, të pakuptueshme dhe ndonjëherë krejtësisht të frikshme”, shkroi nga ana tjetër Jacob Roach për Digital Trends.
Megjithatë, ChatGPT tërhoqi 1 milion përdorues brenda një jave pas publikimit të tij dhe Microsoft tha se iu deshën vetëm 48 orë që një milion njerëz të nënshkruanin një listë pritjeje për Bing-in e ri me inteligjencë artificiale.
Përkthyer nga “The New York Times”
j.l./ dita
