Të vetëpunësuarit që paguan tatim këtë vit, do të rimarrin paratë e tyre. Ngërçi i krijuar pas rrëzimit të tatimit 15% nga Gjykata Kushtetuese, duket se do të marrë zgjidhje brenda këtij viti.
Brenda dhjetorit të këtij viti, profesionistët e lirë që kishin paguar tatimin prej 15%, do të marrin paratë e tyre mbrapsht. Ata do të kenë në llogari pagesat e tyre që kanë derdhur në Tatime, pasi Gjykata Kushtetuese e rrëzoi tatimin, ndërsa shuma e përbashkët llogaritet të jetë rreth 10 mln euro.
“ Ka një vullnet nga ana e qeverisë për të kthyer këto fonde mbrapsht. Unë besoj se brenda muajit dhjetor do të kthehen të gjitha fondet për profesionet e lira”,-tha Petrit Malaj.
Ndërkohë, Fondi Monetar Ndërkombëtar i sugjeroi qeverisë të rishikojë strukturën tatimore në vend, duke hequr përjashtimet në taksa për profesionistët e lirë dhe biznesin e vogël në mënyrë që të krijojë një klimë biznesi më drejtë.
Gjatë konferencës së përbashkët për shtyp, të Misionit të Fondit Monetar Kombëtar, Ministrisë së Financave dhe Bankës së Shqipërisë, u evidentuar fakti se është progres në reforma, por ka ende punë për tu bërë në rritjen e të ardhurave, ku u sugjeruar dhe avancimi më i shpejtë me mbledhjen e taksës së pasurisë.
i.b./dita
