Tedi Malaveci do të vijojë të drejtojë Dhomën Kombëtare të Përmbaruesve Gjyqësorë Privatë edhe për katër vitet e ardhshme. Ai është rivotëbesuar nga anëtarësia e Dhomës për mandatin 2026-2030, duke marrë mbështetjen për të vijuar drejtimin e organizatës profesionale që përfaqëson përmbaruesit gjyqësorë privatë në vend.
Zgjedhjet u zhvilluan këtë të enjte gjatë Asamblesë së Përgjithshme të Dhomës Kombëtare të Përmbaruesve Gjyqësorë Privatë. Përveç zgjedhjes së kryetarit, gjatë procesit zgjedhor u përcaktuan edhe organet e tjera drejtuese që do të ushtrojnë funksionet e tyre përgjatë katër viteve të ardhshme.
Malaveci është në krye të Dhomës Kombëtare të Përmbaruesve Gjyqësorë Privatë prej vitit 2014 dhe rikonfirmimi i tij në këtë detyrë vijon një angazhim të gjatë në fushën e shërbimit përmbarimor dhe administrimit të drejtësisë. Ai ka lindur në Tiranë në vitin 1972 dhe pas përfundimit të shkollës së mesme të përgjithshme “Petro Nini Luarasi”, kreu studimet në Fakultetin e Drejtësisë të Universitetit të Tiranës gjatë viteve 1991-1995.
Gjatë karrierës së tij profesionale, Malaveci ka ushtruar funksione të ndryshme në institucione shtetërore dhe private të fushës së drejtësisë, duke ndërtuar një eksperiencë të gjatë në sektorin juridik. Në fokus të angazhimit të tij profesional ka qenë edhe shërbimi përmbarimor, si në atë privat, ashtu edhe në atë shtetëror. Ai ka drejtuar shërbimin përmbarimor gjyqësor privat dhe ka mbajtur më herët edhe detyra drejtuese në shërbimin përmbarimor shtetëror.
Përgjatë viteve të angazhimit të tij, Malaveci është përfshirë edhe në punën për hartimin dhe përmirësimin e kuadrit ligjor që lidhet me Institutin e Ekzekutimit të Detyruar. Kontributi i tij është shtrirë në hartimin e akteve ligjore dhe nënligjore, si dhe në përgatitjen e dokumenteve që synojnë unifikimin dhe standardizimin e procedurave të ndjekura nga përmbaruesit gjyqësorë privatë.
Ndër dokumentet që mbajnë autorësinë e tij është edhe “Manuali i modularëve të unifikuar për kryerjen e veprimeve procedurale përmbarimore”, krahas një sërë direktivash, rregulloresh, udhëzuesish dhe orientimesh ligjore të hartuara për përdorim standard në veprimtarinë përmbarimore.
Në aspektin profesional, Malaveci mban titullin e avokatit prej vitit 2006 dhe është certifikuar si përmbarues gjyqësor privat në vitin 2010. Në vitin 2021 ai është certifikuar edhe si “Trajner profesionist ndërkombëtar”, pas përfundimit të një programi njëvjeçar për trajnimin e trajnerëve (ToT), të zhvilluar në kuadër të një programi të qeverisë gjermane përmes Shoqërisë Gjermane për Bashkëpunim Ndërkombëtar.
Prej vitit 2021, Malaveci mban gjithashtu detyrën e Drejtorit Ekzekutiv të Qendrës Kombëtare të Trajnimit të Përmbaruesve. Në të njëjtin vit, ai u bë pjesë e Komisionit Disiplinor të Dhomës Kombëtare të Përmbaruesve Gjyqësorë Privatë, funksion të cilin e ushtroi gjatë periudhës 2021-2025.
b.s / dita
