Qarku i Dibrës që nga e diela mbetet nën ndikimin e të ftohtit. Temperaturat e ulëta kanë mbërthyer Peshkopinë dhe Bulqizën.
Gjatë dy netëve të fundit temperatura maksimale nuk e ka kaluar -4°, ndërsa minimalet gjatë natës kanë variuar deri në -12° në qytet ndërsa në zonat malore termometri ka rënë në -17°.
Situata rrugore sa u përket rrugëve nacionale është e mirë, qarkullimi bëhet pa probleme, pasi është bërë trajtimi me kripë.
Në rrugën e Arbrit ka pasur prezencë të akullit në segmentin nga Fushë Bulqiza deri tek Pishat e Bulqizës, ku duhet të reduktohet shpejtësia, ndërsa autoritetet u kërkojnë drejtuesve të mjeteve të përdorin gomat e dimrit.
Aksi Peshkopi-Kukës nuk ka borë në rrugë, por ka segmente ku ka prezencë akulli në mëngjes dhe shoferët duhet të jenë të kujdesshëm.
Rrugët e Njësive Administrative malore kanë prezencë ngricash dhe kalimi bëhet pjesërisht me zinxhirë. Nuk ka pasur probleme në furnizimin me energji elektrike dhe ujë të pijshëm.
j.l./ dita
