Gjykata e Vlorës dha masën e sigurisë “arrest me burg” për dy çiftet rumune që kamufloheshin si turistë, për të trafikuar 260 kg drogë drejt Greqisë, me kampera luksozë të marrë me qira. Në një seancë me dyer të mbyllura, ku 4 të rinjtë e dyshuar thanë se nuk ishin në dijeni të ngarkesës së hashashit në mjete, gjyqtari i gatshëm pranoi kërkesën e prokurorisë vendore, me aktet e dosjes dhe provat e deritanishme.
Rumunët Marius Cimpeanu, Mihaela Cimpeanu, Florin Tucan dhe Andreea Pislaru, akuzohen për veprën penale ‘trafikim i narkotikëve’ dhe tentativën e trafikut ndërkombëtar. Gjyqtare e çështjes është Herila Çela dhe prokuror Anton Pali. Kurse masa e arrestit në mungesë u dha edhe për 5 shqiptarët e dyshuar si organizatorë, që kishin pajtuar çiftet rumune si korrierë të mallit, e që janë shpallur në kërkim. Të pesë të dyshuarit mësohet se janë nga qarku i Vlorës dhe janë pjesë e një organizate më të gjerë.
Rumunët që kamufloheshin si turistë u ndaluan nga blutë e Vlorës tre ditë më parë, në operacionin e koduar “Camper”, në të cilin policia sekuestroi sasinë e lëndës narkotike. Ata u mbajtën në monitorim dhe u ndaluan në “Qafë Botë” nga policia, ndërsa transportonin me kamper lëndën narkotike, me qëllim transportimin në Greqi.
Droga ishte e vendosur në vende të përshtatura në dy kamperat, si dhomëza të fshehta. Sipas informacioneve, droga dyshohet të jetë furnizuar nga shtetas shqiptarë. Të arrestuarit që merreshin me trafik të lëndëve narkotike e bënin këtë aktivitet përmes kamperave luksozë, me të cilët transportonin drogën dhe duke përdorur si transportues pikërisht turistë të huaj dhe kryesisht çifte, që të mos binin në sy.
