Presidenti i Republikës, Bajram Begaj ka shprehur ngushëllimet për jetë e humbura nga tërmeti shkatërrues, që goditet këtë të hënë Turqinë dhe Sirinë.
“I pikëlluar thellësisht nga tërmeti shkatërrues që goditi Turkiye dhe Sirinë këtë mëngjes. Unë dhe shqiptarët qëndrojmë pranë njerëzve të prekur dhe familjeve të tyre, që humbën të dashurit e tyre në këtë tragjedi të tmerrshme, duke shprehur ngushëllimet, mendimet dhe lutjet tona të sinqerta”, shkruan Begaj.
Deri tani nuk ka shqiptarë të prekur, njoftoi MEPJ.
“Bazuar në komunikimin me Ambasadën e RSH në Turqi (që prej orëve të para të mëngjesit e deri tani) nuk ka informacion për shqiptarë të lënduar ose që mund të kenë humbur jetën. Do të komunikojmë në vijim për çdo info të përditësuar”, njoftoi MEPJ.
Ambasada e Kosovës në Ankara ka shprehur ngushëllimet për jetët e humbura, ambasada ka vënë në dispozicion disa numra kontakti ku qytetarët shqiptarë mund të telefonojnë për raste emergjente.
“Ndjejmë dhimbje të thellë për viktimat si pasojë e tërmetit që goditi disa provinca të Turqisë në mëngjesin e sotëm. Shprehim ngushëllimet tona të sinqerta për popullin e Turqisë dhe urojmë shërim të shpejtë për të gjithë të prekurit nga ky tërmet”, thuhet në njoftim.
Holanda do të dërgojë një ekip kërkim-shpëtimi në Turqi për të ndihmuar në përgjigjen ndaj tërmetit që la qindra të vdekur. Lajmin e dha ministri i JAshtëm holandez, Wopke Hoekstra.
“Ky ekip përfshin policë dhe personel ushtarak të ndihmës së parë dhe zjarrfikës. Të tronditur nga lajmi i tërmetit shkatërrues në Turqi dhe Siri. Mendimet tona janë me viktimat, familjet e tyre dhe shumë turq e sirianë të plagosur”, tha Hoekstra në Twitter.
j.l./ dita
