Tërbuni i Pukës u përjashtua pak ditë më parë nga kampionati i këtij sezoni në Kategorinë e Parë dhe nga sezoni i ri do luajë në Kategorinë e Dytë të futbollit. Komisioni i Disiplinës e argumentoi këtë vendim për ‘mos garantimin e sigurisë’ në ndeshjen kundër Turbinës për javën e 21-të, me duelin që në fund prodhoi tension për vendimet e arbitrit.
Këtë mesditë, drejtuesit dhe tifozët e Tërbunit kanë protestuar para zyrave të Federatës Shqiptare të Futbollit në Tiranë. Kanë qenë disa dhjetra protestues që kanë ngritur zërin kundër dënimit, teksa kanë ngjitur në muret rrethuese të institucionit foto të shkëputura nga ndeshja e fundit, që solli edhe përjashtimin e tyre. “Armando Krimi organizon dhe policinë e shtetit për t’i mbrojt zyrat e tij të inkriminuara. Këto protesta nuk do të ndal këtu do të kemi dhe një protestë tjetër më të madhe në ditët në vijim”, shkrujne tifozët e Tërbunit.
