Një 31-vjeçar është arrestuar nga Policia e Tiranës, pasi akuzohet se kanosi me armë zjarri vëllanë e tij dhe dajën, në një konflikt brenda familjes. Policia njoftoi se prangosi të dyshuarin Iljaz Mecanin, 31 vjeç, banues në Tiranë, i dënuar më parë për vjedhje.
Nga veprimet hetimore dyshohet se 31-vjeçari ka ushtruar dhunë fizike në mënyrë të përsëritur ndaj vëllait të tij dhe dajës, si dhe i ka kanosur ata me armë zjarri, për motive të dobëta. I dyshuari ishte i skeduar si person problematik dhe i dhunshëm më herët. Burime zyrtare thanë se gjatë kontrollit në ambientet e banesës së Mecanit, janë gjetur të fshehura 1 armë zjarri pistoletë, 1 armë zjarri automatike, 2 krehra fishekësh dhe municion luftarak, që u sekuestruan në cilësinë e provës materiale. Ndaj tij janë ngritur akuzat për kanosje, dhunë në familje dhe armëmbajtje pa leje.
