Pistoletat që do trafikoheshin drejt Anglisë nga Porti i Durrësit dhe më pas Italia, besohet se ishin porositur nga një organizatë kriminale shqipfolëse që vepron në ishull, me qëllim kontrollin e biznesit të saj ilegal dhe ruajtjes nga rivalët. Kapja e 8 pistoletave të markave të ndryshme, kryesisht “Glock” të precizionit të lartë, ka shtyrë edhe prokurorët e SPAK që t’i drejtohen me një letër-porosi autoriteteve angleze, me qëllim kërkimin e ndihmës juridike.
Armët e bllokuara, kishin si destinacion Anglinë. SPAK për këtë qëllim kërkon ndihmën e britanikëve që të zbulojnë pritësin. Kjo do shërbejë edhe për vetë autoritetet angleze, për të goditur një tjetër aktivitet të paligjshëm në ishull.
Pakoja postare, e përbërë nga një tavolinë druri, ku ishin futur 8 pistoletat që u zbuluan nga qeni i policisë, do pritej nga një person në Angli. Emri i personit dhe numri i telefonit të tij ishte shënuar në pako. Por për shkak se ky person ndodhet në Angli, SPAK ka kërkuar nga policia e këtij vendi që të kryejë verifikime me qëllim gjetjen. Kapja e 8 pistoletave ka sjellë hetime edhe për pronarin e agjencisë së transportit, “Sihana Transport”, që besohet se është i implikuar direkt në këtë trafik ndërkombëtar.
Kompania vepron në Shqipëri, pranë një spitali privat në Tiranë. Ndërsa rezulton se prej shkurtit 2021 të jetë regjistruar si biznes dhe zonën Lutonit në Londër, ku pronar i së cilës është Guxim Sefolli. Ky i fundit nuk gjendet në vendin tonë, teksa I kërkohet anglezëve që ta zbulojnë dhe ndalojnë nëse do jetë e nevojshme.
Lidhur me këtë ngjarje në Durrës pak ditë më parë u arrestua shoferi i furgonit, Jetmir Koloshi, i cili aktualisht është mbyllur në masën e sigurisë “arrest në burg” dhe e ka mohuar dijeninë për aktivitetin e paligjshëm, duke thënë se bënte vetëm korrierin e mallrave që vinin apo dërgoheshin nga dhe për emigrantët shqiptarë në ishull. Ai ka shpjeguar se detyrë kishte dërgimin e pakove deri në Itali dhe aty merreshin në dorëzim nga dikush tjetër, pasi vetë nuk kishte vizë angleze.
