Të paktën 7 persona kanë humbur jetën dhe mbi 100 të tjerë kanë mbetur të plagosur pas një përplasjeje të rëndë mes dy trenave në provincën e Gizës, në Egjipt.
Aksidenti tragjik ndodhi pranë qytetit El Ayyat, në jug të kryeqytetit Kajro, kur dy trenat që udhëtonin në të njëjtin drejtim u përplasën me njëri-tjetrin, duke bërë që disa nga vagonët të dilnin nga shinat.
Pas marrjes së njoftimit për ngjarjen, dhjetëra autoambulanca dhe ekipe shpëtimi u nisën drejt vendit të ngjarjes për t’i dhënë ndihmën e parë të plagosurve dhe për t’i transportuar ata në spitalet e zonës.
Autoritetet vendase kanë nisur një hetim paraprak për të zbardhur shkaqet e plota të kësaj tragjedie të re hekurudhore, ndërkohë që numri i viktimave mund të ketë lëvizje në orët në vijim ndërsa vijojnë operacionet e kërkim-shpëtimit.
o.p. / dita
