Presidenti i SHBA-së, Donald Trump, ka dhënë dritën jeshile për ekzekutimin me pushkatim të Nidal Malik Hassan, ish-psikiatër i Ushtrisë Amerikane i dënuar për masakrën e 13 personave në Fort Hood të Teksasit në vitin 2009.
Zëdhënësi i Pentagonit, Sean Parnell, tha se Sekretari i Luftës, Pete Hegseth kishte rekomanduar që Hassan të ekzekutohej dhe se Presidenti Trump e kishte miratuar propozimin.
Data dhe vendi i ekzekutimit nuk janë njoftuar ende, por sipas planit aktual ushtarak, ekzekutimi duhet të ndodhë brenda 150 ditëve nga miratimi presidencial, por jo më herët se 60 ditë.
Masakra e vitit 2009
Hassan hapi zjarr më 5 nëntor 2009, brenda bazës ushtarake Fort Hood në Teksas. Sulmi vrau 13 persona, 12 ushtarë dhe një civil dhe plagosi 32 të tjerë. Ai kishte shprehur kundërshtimin e tij ndaj luftërave amerikane në Afganistan dhe Irak, të cilat i konsideronte të paligjshme.
Gjatë sulmit ai u plagos nga të shtënat me armë zjarri dhe që atëherë është pjesërisht i paralizuar. Ish-psikiatri ushtarak u dënua me vdekje nga një gjykatë ushtarake në vitin 2013.
Nëse kryhet, ekzekutimi i Hassanit do të jetë ekzekutimi i parë ushtarak në Shtetet e Bashkuara që nga viti 1961. Në atë kohë, u ekzekutua ushtari John Bennett, i cili ishte dënuar për përdhunimin dhe tentativën e vrasjes së një vajze 11-vjeçare në Austri.
Ushtria amerikane kishte filluar tashmë në muajt e fundit të përgatitej për një rifillim të mundshëm të ekzekutimeve ushtarake, si pjesë e një plani që parashikon procedura specifike pas miratimit presidencial.
j.l./ dita
