Presidenti amerikan Donald Trump nënshkroi të mërkurën një projektligj që urdhëron Departamentin e Drejtësisë të publikojë brenda 30 ditëve të gjitha dosjet e lidhura me Jeffrey Epstein, autorin e ndjerë të krimeve seksuale.
Ligji detyron publikimin e dokumenteve hetimore në një format të kërkueshëm dhe të shkarkueshëm, përfshirë transkripte intervistash të viktimave e dëshmitarëve, materiale të sekuestruara, komunikime të brendshme të DOJ-it dhe regjistra fluturimesh.
Megjithatë, disa pjesë mund të mbeten të redaktuara nëse cenojnë privatësinë ose hetimet aktive.
Trump, i cili më parë ishte kundër publikimit të dosjeve, ndryshoi qëndrim pas presionit të viktimave dhe disa anëtarëve republikanë.
Me mbështetjen e tij, projektligji u miratua me shumicë dërrmuese në Kongres me 427 vota pro dhe vetëm 1 kundër në Dhomën e Përfaqësuesve, ndërsa Senati dha pëlqimin unanim.
Në një deklaratë, Trump aludoi se dokumentet mund të ekspozojnë lidhjet e disa demokratëve me Epstein.
“E vërteta rreth këtyre demokratëve dhe lidhjeve të tyre me Epstein do të zbulohet së shpejti, sepse unë sapo kam nënshkruar projektligjin për të liruar dosjet!”
Epstein, i cili u gjet i vdekur në qelinë e tij në vitin 2019 në atë që u cilësua si vetëvrasje, kishte lidhje me figura të shumta të profilit të lartë, përfshirë Donald Trump, Andrew Mountbatten Windsor, Steve Bannon dhe personalitete të tjera nga politika, biznesi dhe argëtimi.
Dokumentet e reja vijnë pas publikimit të mbi 20,000 faqeve nga pasuria e Epstein të publikuara nga Kongresi javën e kaluar, disa prej të cilave përmendin vetë Trumpin.
Familja e Virginia Giuffre, viktimë e njohur në rastin Epstein, e cilësoi nënshkrimin e ligjit si “monumental” dhe kërkoi transparencë të plotë për çdo emër, pavarësisht pushtetit apo përkatësisë politike.
Ligji i jep Prokurores së Përgjithshme Pam Bondi autoritetin të mbajë të pazbuluar çdo informacion që cenon hetime federale në vazhdim ose që identifikon viktimat.
Republikanë si kongresmeni Thomas Massie kanë shprehur shqetësime se këto përjashtime mund të përdoren për të mbajtur sekret dosje të rëndësishme.
j.l./ dita
