Edhe të rinjtë po preken nga tuberkulozi. Të dhënat e raportuara nga strukturat shëndetësore tregojnë se gjatë viteve të fundit shfaqet në rritje numri i rasteve të konstatuara me këtë sëmundje edhe tek grupmoshat e reja. Peshën më të madhe të sëmundjes e mban popullata aktive 15 deri 45 vjeç.
Vetëm gjatë vitit të shkuar në vendin tonë janë konfirmuar 292 raste të reja, pjesa dërrmuese e të cilave përbëhej nga moshat e reja.
- Publicitet -
Sipas mjekëve pneumologë, shkak për përhapjen e sëmundjes po bëhet gjithnjë e më mënyra e jetesës dhe sjelljes së të rinjve (qëndrimi në ambiente të mbyllura për kohë një të gjatë dhe higjiena jo e mirë).
Aktualisht në spitalin “Shefqet Ndroqi” janë të shtruar 4 pacientë më tuberkuloz, dy të rinj dhe dy të tjerë të moshës mbi 60 vjeç.
Tuberkulozi shkaktohet nga bakteri (Mykobakteri tuberkulosis) i cili më shpesh prek mushkëritë. Kjo sëmundje përhapet nga njeriu tek njeriu nëpërmjet ajrit. Njerëzit e sëmurë me tuberkuloz në mushkëri, në momentin që kolliten apo teshtijnë, përhapin në ajër bakterin e tuberkulozit. Një person mund të thithë disa nga këto baktere dhe të infektohet. Përafërsisht një e katërta e popullatës në botë ka tuberkuloz latente, që do të thotë se njerëzit janë infektuar me bakterin e TB-së por akoma nuk janë të sëmurë dhe nuk mund ta transmetojnë sëmundjen. Njerëzit që janë infektuar me bakterin e TB-së kanë 5-15 për qind rrezik që të sëmuren me tuberkuloz. Megjithatë, njerëzit me sistem imunitar të dëmtuar si, ata që janë HIV pozitiv, të kequshqyerit dhe diabetikët, ose ata që janë duhanpirës, kanë një rrezik më të madh për t’u sëmurur me TB.
Kur një person sëmuret me TB, simptomat (si: kolla, temperatura, djersitja natën apo humbja në peshë) për disa muaj mund të jenë të një forme të lehtë, duke vonuar kërkimin e ndihmës mjekësore, gjë që çon në infektimin e njerëzve të tjerë për sa kohë personi nuk merr mjekim. Njerëzit me tuberkuloz aktiv mund të infektojnë 10-15 njerëz të tjerë nëpërmjet kontaktit të ngushtë përgjatë një viti. Në mungesë të trajtimit të duhur, 45 për qind e personave të cilët janë HIV negativ por të sëmurë me TB dhe ata me HIV pozitiv të shoqëruar dhe me TB do të vdesin.
Tuberkulozi është një sëmundje ngjitëse që transmetohet përmes rrugëve të frymëmarrjes. Vaksina që kryhet në ditët e para të jetës nuk na bën imun ndaj infektimit, por ndaj formave të rënda të sëmundjes. Për këtë arsye vdekjet nga tuberkulozi në Shqipëri janë në nivele shumë të ulëta. Aktualisht, Tirana mban vendin e parë për rastet më të shtuara me këtë sëmundje, ndjekur nga Peshkopia dhe Shkodra.
p.k\dita
