Qani Xhafa, i cili mori mandatin e deputetit Luçiano Boçi pasi ky i fundit kandidon për kryetar bashkie në Elbasan, pranon në formularin e dekriminalizimit se është nën hetim nga policia. Në dokumentin e siguruar nga Dosja.al, shihet se Xhafa deklaron se është ndaluar nga efektivët e Elbasanit pasi u aksidentua në këtë qytet.
Ngjarja ndodhi më 13 mars të këtij viti. Xhafa po udhëtonte në gjendje të dehur në bulevardin “Qemal Stafa” në Elbasan, kur u përplas me trafikndarëse në rrugë.
Pas aksidentit, Xhafa është arrestuar nga efektivët e policisë dhe me bërjen e testit rezultoi se kishte qenë në gjendje të dehur në timon.
Qani Xhafa kandidoi për PD-në në zgjedhjet e përgjithshme të vitit 2021 në qytetin e Elbasanit ku ishte i renditur i 8 në listë, pas Luçiano Boçit.
Tashmë, me dorëzimin e mandatit nga Boçi, Xhafs iu hap rruga dhe ka vendosur të pranojë mandatin e deputetit. Ai ka plotësuar dhe formularin e dekriminalizmit në të cilin pranon se është lënë në masën ‘detyrim paraqitjeje’ dhe se hetimet për aksidentin në fjalë vijojnë ende.
