Shorti për ndarjen e banesave të reja për familjet e prekura nga tërmeti në Baldushk, do të hidhet në datën 12 prill.
Bashkia e Tiranës bën me dije se shorti publik për përzgjedhjen e njësive të reja të banimit, në objektet e ndërtuara në lagjen e re Baldush, për sistemimin e subjekteve përfituese të programeve të rindërtimit me strukturën e banesës dhe përbërjen familjare do të hidhet pranë ambienteve të shkollës së ciklit të ulët “Mustafa Koc”.
Procedura e përzgjedhjes së njësisë së banimit në objektet e reja, do të bëhet përmes një shorteu të hapur dhe publik, në kuadër të procesit të rindërtimit, që më parë është afishuar edhe pranë njësisë administrative dhe faqen zyrtare të internetit të Bashkisë Tiranë.
Të pranishëm në hedhjen e shortit duhet të jetë një nga familjarët, ose kur kjo nuk është e mundur, mund të bëhet nga një përfaqësues me prokurorë. Nëpërmjet një procesi të hapur dhe transparent nga ana juaj do të bëhet edhe përzgjedhja e njësisë së re të banimit.
Në rast se as qytetari që do të përfitojë banesë të re, apo përfaqësuesi i përzgjedhur prej tij, nuk paraqitet edhe pse ka marrë rregullisht njoftimin, atëherë të drejtën e përzgjedhjes e ushtron Kryetari i Komisionit, në prani edhe të subjekteve të tjera përfituese dhe rezultati i përzgjedhjes pasqyrohet në procesverbal në të cilin evidentohet e gjithë kjo procedurë.
Pas tërmetit, Bashkia e Tiranës në bashkëpunim dhe me qeverinë nisën procesin e rindërtimit të banesave individuale si dhe të pallateve të dëmtuara. Gjatë kësaj kohe, Bashkia ka vijuar me dhënien e bonusit të qerasë për të gjitha familjet gjer në marrjen e çelësave të banesave të reja, ndërsa shpërndau dhe grante për rikonstruksionin e banesave që kishin një shkallë më të vogël dëmtimi.
p.k\dita
