Ish-shefi i Policisë Kriminale, njëkohësisht zv/shef i Komisariatit të Policisë nr. 3 në Tiranë, Erjon Dani, është vetëdorëzuar në policinë e Himarës, pasi është informuar nga mediat se ndaj tij kishte një urdhër arresti të firmosur nga SPAK.
Sipas SPAK, Erjon Dani ka shpërdoruar detyrën gjatë kohës që ndodhej në radhët e Policisë së Shtetit pasi të dhënat nga TIMS ia ka vënë në dispozicion një prej personave nën hetim.
SPAK goditi ditën e sotme një grup kriminal që operonte në trafikun e drogës nga Amerika Latine drejt vendeve të BE-së.
Në pranga përfunduan 8 persona, përfshirë dhe Erjon Danin që u vetëdorëzua, ndërsa 5 të tjerë janë shpallur në kërkim.
SPAK ka sekuestruar disa makina të ndryshme si Maserati, Porche, Audi RS6, Audi E TRON, Volkswagen Golf 8, një motor Honda XADV, mbi 38 mijë euro, 200 dollarë, tetë telefona celularë (mes tyre disa të enkriptuar), një armë sportive, 40 fishekë të kalibrit 7.62 mm, kokainë dhe dokumente të ndryshme.
Ndërkohë një prej të arrestuarve u kap në flagrancë me armë pas kontrolleve të ambienteve.
SPAK thotë se po vijon hetimet për të identifikuar personat e tjerë që dyshohet se janë përfshirë në këto veprimtari të paligjshme kriminale.
