Më në fund edhe Alejandro Baena, lojtari i Villarealit, ka publikuar një deklaratë në rrjetet e tij sociale, ku mohon të ketë fyer mesfushorin Fede Valverde, i cili e goditi me grusht në zonën e autobusit, pas ndeshjes mes Real Madridit dhe skuadrës verdhezi. “Është përdorur një fatkeqësi për të justifikuar agresionin dhe ka gënjeshtra që më shumë lëndojnë se goditjet”, thotë lojtari i Villarrealit.
Kjo është deklarata e plotë:
“Të shtunën e kaluar u sulmova nga një koleg në fund të ndeshjes kundër Real Madridit. Pas ngjarjes dolën në dritë disa deklarata që dyshohet se janë bërë nga rrethi i tij, në të cilat thuhej se kishte uruar dhimbjen e një të afërmi të tij. Që atëherë, dhe sigurisht, asnjë provë nuk është publikuar për të vërtetuar faktet që akuzohen ndaj meje. Një fatkeqësi u përdor për të justifikuar agresionin dhe ka gënjeshtra që më shumë lëndojnë se goditjet. Dëmi që po i bëhet familjes sime është i pariparueshëm dhe i pajustifikueshëm: kërcënime, fyerje, madje edhe mesazhe private që urojnë vdekjen e familjes sime. Dje e kam denoncuar rastin në polici. Lëreni drejtësinë të bëjë punën e saj. Tani synimi im i vetëm është të fokusohem në profesionin tim dhe të ndihmoj klubin tim të arrijë objektivat e tij”.
