Nuk do të ketë ekstradim drejt Italisë për “Ufo”-n, por dënimin e dhënë për vrasje, do ta vuajë në burgjet shqiptare. Ilir Paja, një eksponent i njohur për krimet në vendin fqinj, përfshi vrasje, plagosje, kanosje, apo dhe arratisje nga qelia, ku iu edhe nofka e mësipërme, do të vuajë ne Shqipëri 25 vite burg, dënimi i dhënë nga gjykata italiane për disa vepra të rënda penale. Kërkesa e Prokurorisë u pranua nga Gjykata e Tiranës, për konvertim dënimi dhe njohje pas transferimit të dosjes. Kurse avokatët kundërshtuan dhe thanë që do e apelojnë, pasi Ilir Paja sipas tyre e ka kryer një herë dënimin për këto akuza.
Në dosjen e autoriteteve të vendit fqinj theksohet se Paja është i akuzuar dhe dënuar për krime si vrasja, vrasje e mbetur ne tentative, marrëdhënie seksuale me dhunë dhe armëmbajtja pa leje. Sipas vendimit të gjyqtarit Gerd Hoxha, i arrestuari vitin e kaluar në Laprakë, do ta kryejë heqjen e lirisë në Shqipëri, ku me heqjen e kohës së paraburgimit, dënimi i mbetur është 24 vjet e 8 muaj burg. Avokatët thanë se Paja është dënuar njëherë për këto vepra nga Gjykata e Krimeve të Rënda dhe ka kryer 17 vite burg. “Është vendim i padrejtë, pasi gjykata e shkallës së parë për krime të rënda e ka dënuar Ilir Pajën për të njëjtat fakte penale dhe ai vendim është ekzekutuar nga ana e shtetasit Ilir Paja dhe në këto kushte është një nga kriteret ligjore ku nuk plotësohen kushtet për njohjen e vendimit penal të huaj, kur nga ana e Republikës së Shqipërisë, është lëshuar një vendim mbi të njëjtat vepra penale”, u shpreh avokatja, Arjola Shehri.
Ilir Paja u arrestua në nëntor të vitit 2022 në Tiranë, në një lokal në Laprakë. Gjatë arrestimit policia i sekuestroi dhe një shumë prej 5 mijë eurosh. Tre muaj i janë dashur policisë të vërtetojë se personi që mbanin në përgjim, ishte i shumëkërkuari nga drejtësia italiane, i dënuar me 25 vite burg për vrasje dhe rrëmbim personi, ngjarje që kanë ndodhur rreth vitit 2006. Paja ishte arrestuar në mars të vitit 2008, pasi mori përpara me makinë një efektiv të policisë kriminale në Tiranë, i cili e njohu të shumëkërkuarin. Pas gati 10 viteve në qeli, në nëntor të 2017-ës, Ilir Paja u lirua me kusht para përfundimit të dënimit nga gjyqtarja Enkeleida Hoxha, me argumentin se vuante nga një sërë sëmundjesh, të vërtetuara me raporte mjekësore. Ilir Paja mori nofkën “Ufo” nga policia italiane, për shkak të dy arratisjeve spektakolare nga burgjet e sigurisë së lartë në vendin fqinj.
