Komisioni Qendror i Zgjedhjeve ka shpallur urdhrin për vazhdimin në mënyrë të pandërprerë të procesit të numërimit për zgjedhjet vendore.
Sipas urdhrit, KQZ kërkon që të gjitha KZAZ-të të zhvillojnë procesin e numërimit të votave në mënyrë të pandërprerë, si edhe të marrin masa për zëvendësimin në kohë të anëtarëve të grupeve të numërimit, nëse rast se ata largohen, tërhiqen apo kanë qëndruar në detyrë me orar të zgjatur.
Vendimi i KQZ-së vjen pasi Në Finiq, në Malësinë e Madhe, Shijak dhe 4 KZAZ të Tiranës, 38, 35, 28, 27, 26, u pezullua numërimi për shkak të lodhjes së komisionerëve dhe anëtarëve të grupit të numërimit.
Në një deklaratë për mediat, kreu i KQZ-së, Ilirjan Celibashi bëri me dije se numërimi është pezulluar edhe në Kavajë, për shkak të një konflikti që ka patur mes anëtarëve të KZAZ. Celibashi shtoi se po merren masa për zgjidhjen e problemit dhe rinisjen e numërimit të votave.
“Vetëm në Kavajë kemi një problematikë. Në asnjë KZAZ tjetër nuk ka probleme në procesin e numërimit të fletëve të votimit. Është pezulluar dhe në bashkinë e Kavajës për shkak të konfliktit që pati ndërmjet anëtarëve të KZAZ. KQZ po merret me zgjidhjen e situatës dhe shumë shpejt do të nisë numërimi i votave për kandidatët për kryetar bashkie”, tha Celibashi.
Ndërkohë deri në orën 22:00 të mbrëmjes së sotme pritet të përfundojë procesi i tabulimit të rezultatit për të gjitha KZAZ-të.
p.k\dita
