Presidenti Bajram Begaj ka pritur në ditën e dytë të vizitës së saj, presidenten e Komisionit Europian në Tiranë, Ursula von der Leyen.
Në një postim në rrjetin social “X”, Von der Leyen falënderoi presidentin Begaj për takimin, duke e vlerësuar për angazhimin e tij personal për të ardhmen e Shqipërisë në Bashkimin Europian. Gjithashtu ajo vlerësoi punën e bërë nga kreu i shtetit për perspektivën unike për pajtimin, integrimin dhe prosperitetin e rajonit.
“Kënaqësi të takoja me presidenten Von der Leyen dhe të shkëmbeja pikëpamjet për integrimin e Shqipërisë dhe për rrugën e rajonit drejt anëtarësimit në BE. Falënderoj Presidenten Von der Leyen për angazhimin e saj personal në përshpejtimin e procesit për hapjen e të gjithë kapitujve për Shqipërinë brenda vitit 2025. Ne jemi përkushtuar për të përmbushur aspiratat e popullit shqiptar,” shtoi presidenti Begaj.
Ditën e djeshme, zyrtarja e lartë e BE-së zhvilloi një takim me kryeministrin Edi Rama. Pas konferencës së përbashkët për shtyp, më tej dy zyrtarët u bënë pjesë e ceremonisë së hapjes së Kolegjit të Europës.
Turneu institucional i presidentes Von der Leyen do të vijojë ditën e sotme në Maqedoninë e Veriut. Presidentja e KE-së do të vizitojë edhe Bosnjë-Hercegovinën, ku fillimisht pritet të shkojë në zonat e prekura nga përmbytjet e fundit vdekjeprurëse.
Nga Bosnja ajo do të shkojë në Serbi, ku do të takohet me presidentin Aleksandar Vuçiq dhe kryeministrin Millosh Vuçeviç, ndërsa të shtunën turneun i saj do të përmbyllet me një vizitë në Kosovë dhe Mal të Zi.
Thanks for a good meeting @BajramBegajAL
I deeply appreciate your personal commitment to Albania’s future in our Union.
As well as your unique perspective on the region’s reconciliation, integration and prosperity. pic.twitter.com/MZYc4a6lTE
— Ursula von der Leyen (@vonderleyen) October 24, 2024
j.l./ dita
