Drejtuesi politik i Partisë Socialiste për Qarkun e Tiranës, Erion Veliaj, ka zhvilluar disa takime elektorale pasditen e sotme në Kavajë dhe Rrogozhinë.
Në takimin me socialistët në Rrogozhinë, Veliaj tha se Partia Socialiste e kërkon votën për të bërë më shumë punë për qytetarët, ndërsa opozita i përdor qytetarët për të mbushur autobusët e “revolucioneve”.
“Kur në Tiranë je drejtori i bingove, basteve dhe lojërave të fatit të Saliut dhe sa vijnë zgjedhjet transferohesh në Rrogozhinë, që t’i shfrytëzosh njerëzit për zgjedhje, kjo është fyerje. Ndaj, ftesa ime për ata që janë të djathtë – aq pak sa kanë ngelur në Rrogozhinë – është: ‘O shokë, pse pranoni të fyheni nga partia juaj?
Pse pranoni të bëheni mish për top – mbush autobusë, mbush furgonë për të ardhur në Tiranë dhe për të lënë nam me një revolucion që është bërë skandal? Është bërë turpi i botës të shohësh se si vijnë me Range Rover gjithë oborri i partisë. E keni parë se si i gjejnë paratë për autobusë, për sufllaqe, për kamiona e për bataliona? Por nuk kanë mundësi të ndihmojnë njerëzit, qoftë edhe të partisë së tyre”, u shpreh Veliaj.
“Është tallje për demokratët që të vijë si kandidat këtu ai i bingove dhe i lojërave të fatit. Çimi e do pushtetin që të mbushë furgonët për revolucion, njësoj siç bënte Xhelal Mziu në Kamëz.
Pra, ti e do instrumentin që quhet bashki, që të bësh revolucion për Sali vulëhumburin! Bashkia, qeveria, administrata, institucionet janë për të zgjidhur hallet e njerëzve, jo hallet e politikanëve, që u ka humbur vula, që i kanë punët keq dhe që do i kenë keq e më keq sepse do ta mbyllin me turp edhe jetën politike, edhe jetën fizike.
Kjo është diferenca mes atyre që pushtetin e duan që të bëjnë punë dhe atyre që pushtetin e duan që të gjejnë vulë dhe me atë vulë të bëjnë revolucion, që s’ka për të ndodhur kurrë sepse Shqipëria i ka punët vetëm për lart dhe jo më për poshtë,” nënvizoi Veliaj.
Ndërsa në Kavajë, i shoqëruar nga kryetari i kësaj bashkie, Redjan Krali dhe deputeti i PS, Etjen Xhafaj, Veliaj, u takua me gratë dhe vajzat e këtij qyteti.
Ai u shpreh se Kavaja prej kohësh e ka kuptuar që bastioni i vetëm është familja dhe jo partia.
“Kavaja nuk është bastion partish. Kavaja është një bastion zemrash, është një bastion idealesh, është një bastion dashurie, një bastion mbarësie dhe mirësie. Kjo do të thotë që, në qoftë se kemi kuptuar një gjë nga kjo punë, është se partia kryesore nuk është as PS, as PD. Partia kryesore është familja jote.
Të gjitha partitë e tjera vihen në garë që t’i shërbejnë familjes tënde dhe në qoftë se me Redi Kralin këtu në Kavajë, me Edi Ramën në Tiranë, në krye të gjithë Shqipërisë, dhe me gjithë skuadrën tonë, i kemi shërbyer familjeve të Kavajës, atëherë meritojmë ta mbajmë kokën lart e të fitojmë edhe betejën e ardhshme me sukses këtu në Kavajë,” deklaroi Veliaj.
Ai ka falënderuar të gjitha gratë e vajzat, që kanë shërbyer sidomos në sektorë jetësorë publikë, e veçanërisht në momente të vështira si ai i pandemisë që kaluam.
“Ju falënderoj me gjithë zemër për gjithë këtë angazhim të jashtëzakonshëm, nga ato që shërbejnë aty ku ne kemi fëmijët tanë në çerdhe, kopshte e shkolla, mësueset, edukatorët e psikologet që punojnë me kaq shumë dashuri.
Tani që kemi edhe çerdhe, kopshte që janë bërë më të mira, edhe puna është bërë pak më e kollajtë. Dua të falënderoj të gjitha ato që janë doktoresha e infermiere. Në ditët më të vështira të pandemisë ishin edhe më të forta se burrat, e ndërkohë i shërbyen familjes së tyre dhe gjithë qytetit tonë.
Jam i përulur me respekt për të gjitha gratë e vajzat që punojnë në Bashkinë e Kavajës e kanë transformuar totalisht faqen e qytetit, por nuk besoj që ka një angazhim më të madh sesa të jesh një nënë, apo një gjyshe. Ju faleminderit nga zemra dhe ju përulem me shumë respekt e mirënjohje. Gëzuar festën,” uroi Veliaj.
m.b./dita
