Mbajtja në burg prej 10 muajsh, ndërsa ndodhet ende në detyrë, ka sjellë zhvillime për kryetarin e bashkisë Erion Veliaj, që këtë të enjte ka pasur vizita nga një delegacion i Avokatit të Popullit.
Avokatja e Popullit Erinda Ballanca dhe dy komisionerët e AP, Ahmet Prenci dhe Besnik Dedja, vizituan në ambientet e IEVP në Durrës Erion Veliajn, për t’u njohur me kushtet e mbajtjes së tij në qeli, por mbi të gjitha për trajtimin kontrovers që i është bërë në spital, me shoqërimin në masa ekstreme me 30 forca policie dhe madje, jashtë çdo logjike, prezencën e forcave të sigurisë edhe brenda sallës së ndërhyrjes për arsye shëndetësore.
Trajtimi në paraburgim në kushte të rënda dhe gjithashtu kufizimi ekstrem i vizitave dhe kontakteve me avokatët dhe familjen ishte pjesë e temës së komisionerëve të Avokatit të Popullit.
Kujtojmë që Gjykata Kushtetuese i dha të drejtë kryebashkiakut Veliaj për të qëndruar në detyrë dhe për të rimarrë drejtimin e bashkisë, duke cilësuar të parregullt shkarkimin nga këshilli bashkiak dhe Këshilli i Ministrave — një shuplakë e fortë për të gjithë ata që mendonin se epoka e kryebashkiakut Veliaj tashmë kishte perënduar.
