Pak ditë pas masakrës me 3 gra të vrara nga “monstra” Dan Hutra, që në ‘karrierën’ e tij ka marrë në total 4 jetë femrash të pafajshme dhe rrezikoi tre të tjera, vijnë edhe reagimet e familjarëve të viktimave apo palës së dëmtuar. Erjon Hysa, burri i Hasime Dafkut, e cila u vra nga Dan Hutra teksa ishte shtatzënë, ka folur për ‘Pa Gjurmë’. Ai jeton dhe punon në Gjermani, teksa po bëhej gati që për punë javësh të tërhiqte edhe Hasimenë, e cila po bënte kursin e patentës.
Familja e viktimës ka deklaruar se nuk ishte në dijeni të kërcënimeve të Hutrës ndaj familjes Hysa apo se kunata e Hasimesë, Elena, ishte kërcënuar me vrasje, sepse në të kundërt do e kishin hequr vajzën nga banesa e krushqve derisa të qetësohej situata. Erjoni thotë se po të ishte si në shtëpi, nuk do të kishte ndodhur kjo masakër, pasi ndodhej në Gjermani. Ai ka humbur bashkëshorten dhe motrën, por problemet për të nuk kanë të sosur. Kjo tragjedi ka sjellë probleme për të, pasi familja e ish-gruas, Hasime Dafkut, e ka bërë atë fajtor për ngjarjen, për më tepër që ishte edhe shtatzënë disa muajshme.
Erjon Hysa: S’ka fjalë… nuk ka fjalë, nuk di si ta përshkruaj…
Odeta Dume: Erion ju keni qenë në Gjermani në atë kohë ?
Erjon Hysa: Në Gjermani kam qenë, se po të isha në Shqipëri…(hesht)…
Odeta Dume: Ju jeni vëllai që keni humbur dhe bashkëshorten?
Erjon Hysa: Po…
Odeta Dume: Po ju e keni ditur që ky ka qenë një person problematik që e ka kërcënuar ?
Erjon Hysa: Po kush e ka ditur çfarë njeriu ka qenë ky, nuk e ka ditur njeri.
Odeta Dume: Unë dëgjova se ju tashmë keni probleme edhe me njerëzit e ish-gruas, të ndjerës
Erjon Hysa: Po (hesht)…
Odeta Dume: Po gjendja e motrës dhe e nënës si janë ?
Erjon Hysa: Pak më mirë, kur të dalin ato do flasin, se ato e dinë më mirë.
