Venezuela ka shpallur gjendjen e jashtëzakonshme pasi SHBA njoftoi nisjen e një sulmi në shkallë të gjerë dhe arrestimin e presdientit të vendit, Nicolás Maduro.
Sipas autoriteteve venezueliane, vendndodhja e presidentit Maduro dhe e bashkëshortes së tij, Cilia Flores, e cila raportohet gjithashtu e ndaluar, mbetet e panjohur.
Zëvendëspresidentja Delcy Rodríguez konfirmoi se nuk ka informacion mbi vendndodhjen e tyre dhe se, në përputhje me Kushtetutën e Republikës Bolivariane, ajo ka marrë përkohësisht drejtimin e vendit.
Në një komunikim telefonik me televizionin shtetëror Venezolana de Televisión (VTV), Rodríguez kërkoi nga Shtetet e Bashkuara prova të menjëhershme se Maduro dhe Flores janë gjallë. Ajo e cilësoi situatën si një sulm të drejtpërdrejtë ndaj sovranitetit të Venezuelës, duke deklaruar se “na kanë sulmuar, por nuk do të na thyejnë”.
Ndërkohë, ministri i Mbrojtjes, Vladimir Padrino López, denoncoi një sulm të mëparshëm amerikan në Karakas, i cili, sipas tij, ka shkaktuar shpërthime në kryeqytet dhe në disa qytete të tjera të vendit. Ai bëri me dije se autoritetet janë në kërkim të të plagosurve dhe viktimave të mundshme.
“Ky pushtim përfaqëson zemërimin më të madh që ka përjetuar vendi ynë, i nxitur nga lakmia e pangopur për burimet tona strategjike”, deklaroi Padrino López në një video të publikuar në rrjetet sociale. Ai e quajti sulmin “të ndyrë dhe frikacak” dhe u bëri thirrje qytetarëve për qetësi, për të shmangur, siç u shpreh ai, “kaosin dhe anarkinë”.
“Fjalët dhe veprimet e tyre janë po aq vdekjeprurëse sa bombat”, shtoi ministri i Mbrojtjes, duke paralajmëruar se, pavarësisht sulmit, Venezuela nuk do të dorëzohet.
j.l./ dita
