Sa është dëmi që kanë sjellë shkarkimet politike apo të padrejta në punë? Një hetim i emisionit Vetting solli një rast të tillë, por ky nuk është rast i veçuar.
Qindra raste të tjera janë humbur nga shteti përballë qytetarëve duke i kthyer këto shkarkime në një fenomen i cili ka rënduar buxhetin e shtetit.
Rreth 17 miliardë lekë kanë dalë nga buxheti i shtetit për shkarkimet e padrejta nga puna gjatë dekadës së fundit. Këtë e ka deklaruar Ministria e Ekonomisë dhe Financave përmes një përgjigjeje zyrtare.
Që nga viti 2013 deri në vitin 2022 janë gjykuar nga ana e Gjykatës Apelit administrativ 9566 çështje. Sipas burimeve zyrtare të informacionit nga ana e e kësaj gjykate “ gjatë periudhës 04.11.2013 deri 31.12.2022 rezulton që Gjykata Administrative e Apelit ka disponuar me vendime rreth 9566 çështje administrative me objekt “Marrëdhënie pune” apo “Dëmshpërblim page”, të lidhura me largimet nga puna nga Administrata Publike.
Në përgjigjen zyrtare të Gjykatës Administrative të Apelit theksohet se volumi i çështjeve që duhet të trajtohen është shumë herë më i lartë.
Vetëm për vitin 2021, sipas burimeve zyrtare të Gjykatës Apelit Administrative, “janë regjistruar 19.302 çështje, prej të cilave vetëm 887 janë gjykuar, ndërsa presin në radhë për t’u gjykuar edhe 18.415 çështje të cilët do të gjykohen në vitin 2024 e në vazhdim.
b.m/dita
