Deputetët demokratë nuk kanë lejuar nisjen e mbledhjes së Konferencës së Kryetarëve që ishte planifikuar që të fillonte në orën 10:00.
Shkak për bllokimin e nisjes së mbledhjes së Konferencës së Kryetarëve është bërë përjashtimi i 6 deputetëve nga Kuvendi.
Sipas axhendës së publikuar për mediat, në mbledhjen e Konferencës së Kryetarëve pritej që të bëhej prezantimi i projektligjit “Për buxhetin e vitit 2024” nga Ministri i Financave dhe Ekonomisë, Ervin Mete.
Për shkak se opozita bllokoi hyrjen në sallë, mazhoranca u detyrua që të vijonte mbledhjen në një sallë tjetër.
Ata nuk kanë lejuar kreun e grupit parlamentar të Partisë Socialiste, Bledi Çuçi për të hyrë në ambientet e brendshme.
“Turp të keni që na keni përjashtuar”, thonë ata.
Sikurse shihet në foto, një vazo me lule është rrëzuar në hyrje të sallës ku do të mbahet Konferenca e Kryetarëve.
Deputetët e PD-se nuk kanë lejuar as ministrin e Financave, Mete që të futet në mbledhje.
Gjatë takimit me socialistët, Bardhi u përplas me Nikollën, duke i kërkuar sqarime për përjashtimin e tij nga Kuvendi.
Bardhi kërkoi sqarim nga kryetarja e Kuvendit e Shqipërisë, Lindita Nikolla për arsyen e përjashtimit nga Kuvendit. Ai e ndaloi atë para derës ku pritej të mblidhej Konferenca e Kryetarëve.
Bardhi donte të dinte se përse është përjashtuar, ndërkohë që nuk mungoi as akuza se Nikolla ka 2 muaj që shkel rregulloren e Kuvendit.
“Çfarë të kam bërë unë ty që më ke përjashtuar? Pse më ke përjashtuar? Ti ke 2 muaj që shkel rregulloren”, i drejtohet Bardhi-Nikollës.
Kujtojmë se ditën e djeshme, Sekretariati për Procedurën, Votimin dhe Etikën ka vendosur të përjashtojë për 10 ditë nga punimet e Parlamentit deputetët demokratë Gazmend Bardhi, Bledion Nallbati, Flamur Noka, Edi Paloka, Albana Vokshi, për shkak se penguan zhvillimin normal të seancës plenare të ditës së hënë.
j.l./ dita
