Policia e Vlorës ka identifikuar dhe vënë në pranga 29 vjeçarin që vidhte pjesët e makinave, kryesisht të pasqyrave.
Gjatë kontrollit të ushtruar në banesën e 29 vjeçarit në Vlorë, u gjetën dhe u sekuestruan pasqyrat e vjedhura. I arrestuari dyshohet gjithashtu se është autor edhe i disa rasteve të tjera të vjedhjes së pjesëve të automjeteve. Autoritetet e policisë bëjnë me dije se po vijon puna për zbardhjen dhe dokumentimin e këtyre rasteve.
“Shërbimet e Komisariatit të Policisë Vlorë, menjëherë pas marrjes së kallëzimeve nga disa shtetas, për vjedhjen e pjesëve (pasqyrave) të disa automjeteve të parkuara, kanë organizuar punën, me qëllim identifikimin dhe kapjen e autorit të këtyre rasteve. Si rezultat i këqyrjes së pamjeve filmike dhe veprimeve të tjera hetimore, u bë identifikimi, kapja dhe arrestimi në flagrancë i shtetasit G. M., 29 vjeç, banues në Vlorë. Nga veprimet hetimore dyshohet se ky shtetas ka vjedhur 20 pasqyra të automjeteve të parkuara, në disa lagje, në qytetin e Vlorës.
Gjatë kontrollit në banesën e shtetasit G. M., u gjetën pasqyrat e vjedhura, të cilat u sekuestruan në cilësinë e provës materiale”, deklaron policia.
Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme
p.k\dita
